Colombo Telegraph

බොදු බල සේනා වෙසක් කුසල්: වෙසක් උත්සවය නිවැරදිව සැමරිය යුත්තේ කෙසේද ?

වෙසක් උත්සවය නිවැරදිව සැමරිය යුත්තේ කෙසේද ? බොදු බල සේනා නිවේදනය පහත දැක්වේ.

01. වෙසක් උත්සවය ශ‍්‍රී ලාංකික අපගේ පමණක් නොව බෞද්ධ ලෝකයාගේම ප‍්‍රමුඛතම ආගමික උත්සවය බව. ඒ නිසා එහි ඇති ජාතික අනන්‍යතාවන් සේම බෞද්ධ හර පද්ධතිය මත පදනම්ව ගොඩනැගුණු විශ්ව අනන්‍යතාවන් ද ආරක්‍ෂා කිරීමට අප සැම වග බලාගත යුතුබව.

02. බුදු දහම අප ආරක්‍ෂා කරන්නේ හා පෝෂණය කරන්නේ එය අප අනුගමනය කරන දහම නිසාම නොව මේ ශ්‍රේෂ්ඨ දහම මිනිසා සතා සීපාවා ගහකොල පරිසරය මහපොළව ආදී සමස්ත ජීවි-අජීවි පද්ධතියේම යහපැවැත්ම පිළිගන්නා, ඒ යහපැවැත්ම තහවුරු කිරීමට අදාළ මගක් පෙන්වාදෙන දහමක් නිසා බව. ලෝකය අද මුහුණ දී තිබෙන ආර්ථික සාමාජ දේශපාලනික පාරිසරික ආදී සියලූ අර්බුද සමහන් කිරීම සඳහා ශක්තිමත් මග පෙන්වීමක් කරන්නේ බුදු දහම පමණක් බව.

03. වෙසක් උත්සවය ප‍්‍රතිපත්ති පූජාවට මුල්තැන දී පැවැත්විය යුත්තක් වුවද එහි කෙරෙන ආමිස කටයුතු අපි ප‍්‍රතික්‍ෂේප නොකරන බව. ආමිස කටයුතු බුදු දහමේ හර පද්ධතියට එකඟව කළයුතු බව අපි අවධාරණය කරන බව.

04. වෙසක් සමයේ බොහෝ දෙනා යොමු වන්නේ අලෝක කරණයටයි. මෙදින තම නිවස හෝ ව්‍යාපාරික ස්ථානය විශේෂයෙන් අලෝකවත් කරන්නේ ඇයිද යන්න විමසුවොත් බොහෝ දෙනෙකුට ඒ සඳහා ධර්මානුකූල පිළිතුරක් දිය නොහැකියි. සෙසු අයත් කරන නිසා පෙර සිට දිගට කරගෙන ආ නිසා එය කරන බවයි කියන්නේ. වෙසක් දිනයේ අපේ නිවස හෝ අපේ වටපිටාව විශේෂයෙන් ආලෝකවත් කරන්නේ එම දිනය බුදුරජාණන් වහන්සේ විසින් ලෝකයට ප‍්‍රඥාලෝකය දුන් දිනය නිසා එය සංකේතවත් කිරීමටයි. ඒ බව බෞද්ධ අප විශේෂයෙන්ම මතක තබාගත යුතුයි. එසේම ඒ දිනයේ විදුලි හෝ පහන් ලෝකයට වඩා මිනිස් හදහවත්වල ප‍්‍රඥාලෝකය දැල්වීමට අවශ්‍ය කටයුතු අප විසින් කළයුතු බව. අනවශ්‍ය ආකාරයේ විදුලිය අපතේ යැවීම්, පරිසරයට හා සතුන්ට හානි වන පොලිතින් භාවිතය, ස්වභාවික සම්පතක් වන පොල්තෙල් විශාල වශයෙන් දැවීම ආදිය බෞද්ධ ප‍්‍රතිපත්තිවලට පටහැනි බව.

05. දන්සැල් වෙසක් උත්සවයේ තවත් විශේෂ දෙයක්. දානය යනු බුදු දහමේ ඉගැන්වෙන ඉතාම ඉහළ මට්ටමේ ප‍්‍රතිපත්තියකි, පාරමිතාවකි. මෙයින් ප‍්‍රධාන පරමාර්ථ තුනක් ඉටු කරගැනීමට අපේක්‍ෂිතයි. එනම් (1.)පුණ්‍යශක්තීන් වර්ධනය, (2.) අධ්‍යාත්මික පාරිශුද්ධියට අදාළ කුසලතා සංවර්ධනය හා (3.)සමාජ සුභ සාධනයයි. දැන් පැවැත්වෙන බොහෝ දන්සැල් මේ මුඛ්‍ය පරමාර්ථ තුනෙන්ම බැහැරව ඇති අතර සමාජයටද මහත් හිරිහැරයක් වන මට්ටමට වැටී තිබේ. දන්සැල් දියයුත්තේ තම පෞද්ගලික ධනයෙනි. නොඑසේනම් ස්වකැමැත්තෙන්ම වෙනත් අයෙක් දෙන ධනයෙනි. අද බොහෝ දෙනෙක් දන්සැල් දෙන්නේ තම ධනයෙන් නොවේ. මේ සඳහා මුදල් බඩු ආදිය එකතු කෙරේ. බොහෝවිට එය කරන්නේ ඍජු හා වක‍්‍ර බලපෑම් මගිනි. නොදුන් විට අපහාස කරයි අවමන් කරයි. එවිට දෙන තැනැත්තා මේ සඳහා යමක් දෙන්නේ අපිරිසිදු සිතකිනි. එවිට පින් සිදුනොවේ. ආරම්භ වන්නේම හිංසාකාරී ක‍්‍රියාවන්ගෙන් පාප සිතිවිලිවලිනි. මේවා කරන අය තුළ ඇත්තේ ද ප‍්‍රසිද්ධිය කැපී පෙනීම දේශපාලන වාසි ආදී පාපී අකුසල චේතනාය. ඒ නිසා පළමු අභිමතාර්ථය කිසිසේත් ඉටු නොවේ.

දානය ආධ්‍යාත්මික අපිරිසිදුතාවන් වන ලෝභ දෝෂ මෝහ ආදී අකුසලතාවන් දුරු කර හා ත්‍යාගී ගුණය මිත‍්‍රත්ත්වය ප‍්‍රඥාව වැඞීම සඳහා උපකාරී කරගන්නා වූ ක‍්‍රියාකාරකමකි. අද දන්සැල්වලින් ඒ දේ සිදු නොවේ. දෙන්නේ යමක් බලාපොරොත්තුවෙනි. ඒ නිසා එය දානයක් නොව වානිජ කටයුත්තකි, ගනුදෙනුවකි.

තුන්වෙනි කරුණ නම් සමාජ සුභ සාධනයයි. පොදු යහපත වෙනුවෙන් කළයුතු දේ වශයෙන් දැන්සැල් පැවැත්වීම අපේ පුරාණ සම්ප‍්‍රදායයි. උදාහරණ වශයෙන් පැරණි අනුරාධපුර නගරයේ පැවති මහාපාලි දාන ශාලාව හැම දිනකම පැවැත්වූවකි. මෙයින් මැති ඇමති සිටුවරු හෝ සාමාන්‍ය ජනතාව ආහාර නොගත්හ. දුගීන් මගීන් යාචකයින් හා නගරවාසී පැවිද්දන් සඳහා මෙය සූදානම් කර තිබුණි. එය සමාජයේ අවශ්‍යතාවකි. අදත් වැඩිහිටි නිවාස ළමා නිවාස ස්වභාවික ආපදාවලින් අනාථවූවන් ආබාධිත රණවිරුවන් ආදී සමාජය විසින් රැුකගතයුතු පිරිස් අනන්තවත් සිටී. මේ දන්සැල් දෙන අය මෙම සමාජ සුභසාධනයට දායක වන්නේද? මේවා අප ප‍්‍රශ්න කළයුතුයි.

06. හිංසාව බුදු දහම අනුමත නොකරයි. එසේ වුවත් දනසැල්වල බොහෝ හිංසාවන් කෙරේ. මුදල් එකතු කිරීමම බොහෝ දෙනෙකුට කරන හිංසාවකි. දන්සැල් පවත්වන අවස්ථාවේ මාර්ග අවහිර කරමින් ද ඇතැම්විට වාහන බලෙන් නවතා අකැමැති දේවල් බලයෙන් මෙන් කෑමට බීමට බල කරන අවස්ථා කොතෙකුත් තිබේ. මේවා සම්පූර්ණයෙන්ම බොදු ප‍්‍රතිපත්තිවලට පටහැනි බව.

07. දන්සැල් තොරණ වෙසක් පහන්කූඩු ආදියේ පූර්ව ප‍්‍රචාරක දැන්වීම්වලට බුදුරුව යොදා ගැනීම කෙරේ. මෙය නුසුදුසු බව. ඒ ප‍්‍රචාරක දැන්වීම් බොහෝ අවස්ථාවල වතුර කානු ගස්මුල් ආදී තැන්වල දමා තිබේ. වෙසක් උත්සවයෙන් පසු ඇතැම්විට මේ බැනර් බුදුරුව තිබියදීම වෙනත් දේ සඳහා යොදා ගැනුණු අවස්ථා අප දැක ඇත. එබැවින් ප‍්‍රචාරණ කටයුතු සඳහා බුදුරුව යොදාගැනීම නතර කළයුතු බව.

08. බොදු බැතිය වැඞීම යැයි කියමින් කරන තොරණ හා පහන්කූඩු ප‍්‍රදර්ශනය, සුභපැතුම් පත් ජාවාරම, ආනයනික වෙසක් සැරසිලි ජාවාරම ආදීය අද වෙසක් උත්සවයට මුවා වී කරන මුදල් හම්බකිරීමේ ජාවාරමක් වී තිබේ. මේවා මුදල් අය කර පෙන්වීම නතරකළ යුතු බව. නොමිලේ කළ නොහැකි අය එසේ කිරීමෙන් වැළකිය යුතුයි. එයින් වෙසක් උත්සවයට කිසිදු හානියක් නොවේ. මහජනතාව ද මුදල් අය කර පෙන්වන වෙසක් සැරසිලි නැරඹීම නොකළයුතු බව.

09. වෙසක් කූඩු පිටරටින් ආනයනය කිරීම වහාම නතර කළයුතු බව. දරුවන්ට සියතින්ම වෙසක් සැරසිල්ලක් කිරීමට වැඩිහිටියන් ඉගැන්වියයුතු ආකාරය.

10. වෙසක් උත්සවයට කිසිදු සම්බන්ධතාවක් නැති වෙස් මුහුණු ඔලූබක්කන් නැටවීම අසෝභන ඇඳුම් ඇඳගෙන මාර්ග අවහිර වන සේ කරන අශික්‍ෂිත හැසිරීම වගකිවයුතු අංශ විසින් නතර කළයුතු බව. මේවා නතර කිරීමට නීති ප‍්‍රතිපාදන මෙන්ම සංස්කෘතික කටයුතු හා ආගමික කටයුතු අමාත්‍යංශවලට පූර්ණ වගකීමක් ඇති බව.

11. බුදුරජාණන් වහන්සේ ලොව පහළ වූ පරිසරහිතකාමී පුද්ගලයින් අතර ප‍්‍රමුඛතම තැනැත්තාය. එසේ නම් වෙසක් දිනයේ අප අතින් වන පරිසර හානි වැළැක්වියයුතු නොවේද? පුවක් පොල් කෙසෙල් වැනි ගස් විශාල වශයෙන් විනාශ කිරීම, පරිසරයට සතුන්ට ඉතා අහිතකර පොලිතින් මහාපරිමාණයෙන් පරිසරයට එකතු කිරීම, ශබ්දවාහිනී යන්ත‍්‍රමගින් කරන පරිසර ¥ෂණය ආදිය මගින් අප කරන වෙසක් උත්සවය අර්ථවත්ද? මේවා නතර කළයුතු බව.

12. වෙසක් සමයේ ජනමාධ්‍යවල හැසිරීම බෞද්ධ පරමාර්ථ ඉස්මතු කිරීමට වඩා වානිජ පරමාර්ථයන්ගෙන් සිදුවේ. ඇතැම් භික්‍ෂූන් වහන්සේලා දැනුවත්ව හෝ නොදැනුවත්ව නළු නිළියන් සේ ප‍්‍රචාරක දැන්වීම්වලට යොදා ගැනේ. මෙය මාධ්‍ය විසින් නැවැත්වියයුතු බව. භික්‍ෂූන් වහන්සේලා ද ඒ සඳහා පෙනී සිටීමෙන් වැළකියයුතු බව.

13. ටෙලි නාටක හා චිත‍්‍රපටවලට බුදු දහම හෑල්ලූවන ආකාරයෙන් බුදු දහමේ යෙදුම් හා නම් යෙදීම. බෞද්ධයින්ගේ මුදල් ගසාකෑම සඳහා බුදු සිරිත හෝ බෞද්ධ ඉතිහාසයේ සිද්ධි පදනම් කරගෙන නිර්මාණය කරන චිත‍්‍රපට අප හෙළා දකින බව. එය බුදු දහමේ නාමයෙන් කෙරෙන වංචනික වැඩක් බව අවාරණය කළයුතුයි.

14. වෙසක් උත්සවය විධිමත් කිරීමටත් එහි ඇති ඉහත කී අශික්‍ෂිත දේ ඉවත් කිරීමටත් ආගමික කටයුතු අමාත්‍යංශය සංස්කෘතික කටයුතු අමාත්‍යංශය ජනමාධ්‍ය අමාත්‍යංශය ආදී වගකිවයුතු අමාත්‍යංශ ගන්නා වැඩ පිළිවෙළ ප‍්‍රශ්න කළයුතුයි

Back to Home page