Colombo Telegraph

දෙමළ නඩුව නිසා සිර දඬුවම් ලැබූ ඩෙන්මාර්කයේ අධිකරණ ඇමතිවරයා

නවින්ද්‍ර ද සොයිසා

ආචාර්ය නවීන්ද්‍ර ද සොයිසා

මහජනතාවගෙන් ලැබෙන බලය දේශපාලන නායකයින් විසින් අයුතු ලෙස පරිහරණය කිරීම් දියුණු නොදියුණු සෑම රටකම සාපේක්‍ෂව අඩු වැඩි වශයෙන් දක්නට ලැබේ. එහෙත් ප්‍රජාතන්ත්‍රවාදය අගයන නීතියේ ආධිපත්‍යය සුරැකී පවතින රටවල වෙනස නම් මාර්ග නීති කඩකරන රියදුරාගේ සිට බලය අවභාවිතා කරන දේශපාලකයා දක්වා තරාතිරම නොබලා නීතිය ක්‍රියාත්මක වීමයි. 

තම පෞද්ගලික ලාභ ප්‍රයෝජන සඳහා දේශපාලන බලය යොදා ගන සිදු කල අක්‍රමිකතාවයන් හේතුවෙන් දඬුවම් ලැබූ දේශපාලන නායකයන් පිළිබඳව ලංකාවේ නැතත් විදේශ රටවලින් මෑතකදීද අසන්නට ලැබේ. දකුණු කොරියාවේ හිටපු ජනාධිපතිනිය වූ පාර්ක් ගන්-හේ මහත්මියට සහ බ්‍රශිලයේ හිටපු ජනපති ලූලා ද සිල්වා මහතාට විරුද්ධව දේශපාලන බලය අවභාවිතා කිරීමේ චෝදනාවලට එම රටවලදී නීතියෙන් දඬුවම් පැමිණවීම මෙයට කදිම උදාහරණයකි. තම පෞද්ගලික ලාභ ප්‍රයෝජන කෙසේ වෙතත් රටට සුභදායක වේ යයි අනුමාන කොට තීරණ ගැනීමේදී පවා තමාට පැවරී ඇති බලය ඉක්මවා යාමක් හෝ බලය අනවශ්‍ය ලෙස භාවිතා කිරීමක් සිදු කල අයට දඬුවම් ලබා දුන් අවස්ථාද දක්නට ඇත. මෙම ලිපියෙන් විස්තර කරනු ලබන්නේ ශ්‍රී ලංකාවේ සිට සංක්‍රමණය වූ දෙමළ සරණාගතයින් සම්බන්ධයෙන් ඩෙන්මාර්කයේ හිටපු අධිකරණ ඇමතිවරයෙකු ගත් අත්තනෝමතික තීරණයක් ඔහුගේ දේශපාලන ජීවිතය අවසන් කල ආකාරයයි.

දෙමළ නඩුව ලෙස මහත් ආන්දෝලනයට තුඩු දුන් මෙම සිදු වීම ආරම්භ වන්නේ 1987 දීය. 1980 දශකයේ මුල සිට ශ්‍රී ලාංකික දෙමළ සරණාගතයෝ දහස් ගණනක් ඩෙන්මාර්කයට සංක්‍රමණය වූහ. එම දශකයේදී පමණක් 3000 ඉක්මවූ මෙම සරණාගතයින් ඇතුළුව මැද පෙරදිග සහ යුගෝස්ලාවියාව වැනි රටවලින්ද විශාල වශයෙන් ඩෙන්මාර්කයට පැමිණියේ එම රටවල පැවති දේශපාලන සහ ජනවාර්ගික ගැටළු හේතුවෙනි. කෙසේ වෙතත් මෙසේ පැමිණෙන දහස් ගණනින් වූ සරණාගතයින් නඩත්තු කිරීම ඩෙන්මාර්ක රජයට ගැටළුවක් වන්නට විය. විශේෂයෙන්ම 1982 දී බලයට පත් වූ දක්ෂිනාන්සික දේශපාලන පක්ෂයක් වූ කොන්සර්වැටිව් පක්ෂය ප්‍රමුඛ රජයට මෙම තත්වය කෙසේ හෝ පාලනය කිරීමට අවශ්‍ය විය. 

මෙවකට අධිකරණ අමාත්‍යවරයා වූ එරික් නීන් හැන්සන් මහතාද සුළුතර ජනවර්ගයන්, විශේෂයෙන්ම සරණාගතයින් සම්බන්දයෙන් දරණ ලද්දේ ඍනාත්මක ආකල්පයකි. තම පෞද්ගලික දේශපාලන මතවාදය මෙන්ම තම රජයේ කැබිනට්ටුවේද මතය ගැන සැලකිලිමත් වූ එරික් නීන් හැන්සන් මහතා සරණාගත ප්‍රශ්නයට විසඳුම් සෙවීමට උත්සුක විය. 3000 ක් පමණ වූ ද්‍රවිඩ ජාතික සරණාගතයින් රටින් පිටුවහල් කිරීමටද මේ වන විට රජය සැලසුම් සකස් කරමින් තිබුණි. මේ තත්වය යටතේ එරික් නීන් හැන්සන් මහතා ද්‍රවිඩ ජාතික සරණාගතයින්ගේ පවුල් වල අයව ඩෙන්මාර්කයට ගෙන්වා ගැනීම සඳහා ඉල්ලුම් කර තිබු ඉල්ලුම්පත්‍ර විශාල සංඛ්‍යාවක් සලකා බැලීම නවත්වන්නට උපදෙස් ලබා දුන්නේය. අධිකරණ අමාත්‍යංශයේ උසස් නිළධාරින් තිදෙනෙකුද මෙම උපදෙස ලහි ලහියේ ක්‍රියාත්මක කර ඉල්ලුම්පත් සියගණනක් සලකා බැලීම අත්හිටවීය.

කෙසේ වෙතත් වැඩිකල් නොගොස්ම ජනමාධ්‍ය සහ විපක්‍ෂයේ දේශපාලන පක්ෂ විශාල සංඛ්‍යාවක් මෙම තීරණය නීති විරෝධී ක්‍රියාවක් මෙන්ම අධිකරණ අමාත්‍යවරයා තම බලය අයුතු ලෙස භාවිතා කිරීමක් ලෙස මතු කර පෙන්වන්නට වුහ. ඔවුනගේ මතය වූයේ රටේ පවතින නීතිය හරියාකාරව ක්‍රියාත්මක කල යුතු බවයි. පවතින නීතියට අනුව ඩෙන්මාර්කයට පැමිණ සිටි මෙම ශ්‍රී ලාංකික ද්‍රවිඩ සරණාගතයින්ට තම පවුල් වල සාමාජිකයින්ද ඩෙන්මාර්කයට ගෙන්වා ගැනීමට අයිතියක් තිබෙන බව ඔවුහු පෙන්වා දුන්හ. දූරදර්ශීව කල්පනා කර නීති සම්පාදනය කරනවා වෙනුවට නිතිය පසෙක තබා හිතු මතයට තීන්දු තීරණ ගෙන තම ධූරයට හිමි බලය අයුතු ලෙස භාවිතා කිරීම පිළිබඳව අධිකරණ අමාත්‍යවරයා වූ එරික් නීන් හැන්සන් මහතාව තද බල ලෙස විවේචනයට ලක් විය.   

මේ අනුව 1989 ජනවාරි මාසයේදී එරික් නීන් හැන්සන් මහතා තම ධූරයෙන් ඉල්ලා අස්විය. රජයේ ප්‍රතිපත්ති ඉදිරියට ගෙන යාමට සහය දුන් අයෙකු මෙන්ම ජ්‍යෙෂ්ඨ දේශපාලනඥයෙකුද වූ නිසා නොබෝ දිනකින් කථානායක ධූරයට පත් කලද පාර්ලිමේන්තුවේ සහ ජනමාධ්‍ය තුලින් මතු වූ විරෝධතා හමුවේ එම වසරේම ඔක්තෝබර් මස කථානායක ධූරයෙන්ද ඉල්ලා අස්වීමට සිදු විය. කෝපන්හේගන් විශ්වවිද්‍යාලයෙන් නීතිය හැදෑරූ, වසර 50ට ආසන්න කාලයක් දේශපාලනය වෙනුවෙන් තම ජීවිතය වෙන් කළ වරෙක  ඩෙන්මාර්කයේ ආරක්ෂක ඇමති වශයෙන්ද වරෙක  මුදල් ඇමති වශයෙන්ද කටයුතු කළ පරිණත සහ ජ්‍යෙෂ්ඨ දේශපාලනඥයාට තම දේශපාලන දිවියට සමු දෙන්නට සිදු වූයේ 1910 න් පසු ඩෙන්මාර්ක් පාර්ලිමේන්තුවේ පළමු වරට දෝෂාභියෝගයකට ලක් වූ දේශපාලනඥයා හැටියටය. අධිකරණ අමාත්‍යවරයාගේ ඉල්ලා අස්වීම පමණක් සිදු වූ බලය අවභාවිතාවට ප්‍රමාණවත් නොවන බව තර්ක කළ විපක්ෂය සහ ජනමාධ්‍ය දිගින් දිගටම එල්ල කල විරෝධතා හමුවේ 1990 දී ශ්‍රේෂ්ඨාධිකරණ විනිසුරු වරයෙකුගේ ප්‍රධානත්වයෙන් විමර්ශනයක් ආරම්භ කිරීමට සිදු විය.

වසර දෙකකට ආසන්න කාලයක් පවත්වන වන ලද විමර්ශන කටයුතු වල ප්‍රතිඵලය නම් පිටු 6000 ට ආසන්න පරීක්ෂණ වාර්ථාවක් 1993 ජනවාරි මස 14 වන දින පාර්ලිමේන්තුවට ඉදිරිපත් කිරීමයි. මෙම වාර්ථාවට අනුව ඔප්පු වූයේද අධිකරණ අමාත්‍යවරයා නීති විරෝධී ක්‍රියාවක් සිදු කර ඇති බවයි. විදේශ ජනමාධ්‍ය “ඩෙන්මාර්කයේ වෝටර් ගේට් සිද්ධිය” මෙන්ම “ටැමිල්ගේට්” ලෙසද හැඳින්වූ මෙම සිදුවීම හේතුවෙන් 1993 දී කොන්සර්වැටිව් රජය විසුරුවා හැරීමටද සිදු විය.  

අමාත්‍ය ධූරයෙන් ඉල්ලා අස්වීම, දෝෂාභියෝගයකට ලක්වීම හෝ රජය විසුරුවා හැරීම තුලින් පමණක් වරද කරුවනට නිසි දඬුවම් නොලැබෙන අතර මේ සඳහා පරීක්ෂණ වාර්ථාවෙන්ද නිර්දේශකර තිබුනේ අපරාධ නඩු පැවරීමට හැකි බවයි. මේ අනුව හිටපු අමාත්‍ය එරික් නීන් හැන්සන් මහතා සහ අධිකරණ අමාත්‍යංශයේ ඉහළ නිලධාරීන් තිදෙනෙකුට එරෙහිව බලය අවභාවිතා කිරීමේ චෝදනාව යටතේ අපරාධ නඩු කටයුතු ආරම්භ කළේය. නඩු කටයුතු ආරම්භයේදී පැමිණිලි පාර්ශවය වෙනුවෙන් රජයේ නීතිඥ වරයා පවසා සිටියේ “සරණාගතයින් හෝ සංක්‍රමණිකයින් පිලිබඳ ප්‍රතිපත්ති පසෙක තැබිය යුතුය. මෙම නඩුව ද්‍රවිඩ ජාතිකයින් පිළිබඳව පමණක් සීමා වූ නඩු කටයුත්තක් නොව සැම පුරවැසියෙකුටම, අධිකරණ අමාත්‍යවරයාට වුවද නීතිය බලපවත්වන ආකාරය පිලිබඳ නඩුවකි” යනුවෙනි.

අපරාධ නඩු විභාගය අවසානයේ 1995 දී බලය අවභාවිතා කිරීම පිලිබඳ චෝදනා තුනකට හිටපු අමාත්‍ය වරයා සහ ඔහු යටතේ සේවය කල අධිකරණ අමාත්‍යංශයේ ඉහළ නිලධාරීන් තිදෙනෙකු වරදකරුවන් විය. එරික් නීන් හැන්සන් මහතාගේ සෞඛ්‍ය තත්වය සහ වයස ගැන සැලකිලිමත් වූ අධිකරණය මාස හතරක අත් හිටවූ සිර දඬුවමක් නියම කළේය. තීන්දුව පිලිබඳව සැහීමකට පත් නොවූ එරික් නීන් හැන්සන් මහතා මානව අයිතිවාසිකම් පිලිබඳ යුරෝපීය අධිකරණයට අභියාචනයක් (නීන් හැන්සන් එරෙහිව ඩෙන්මාර්කය 28972/95) ඉදිරපත් කලද යුරෝපා අධිකරණය විසින් ඩෙන්මාර්කයේ අධිකරණය සාධාරණ සහ අපක්ෂපාති ලෙස කටයුතු කර ඇති බව පවසා අභියාචනා ඉල්ලුම් පත ඉවත දමන ලදී.

දෙමළ නඩුව සම්බන්ධයෙන් “බලය ලත් මිනිසුන්” (Magtens Maend 1993) නම් වූ කෘතිය සම්පාදනය කළ මාධ්‍යවේදීන්ට අනුව අධිකරණ අමාත්‍යවරයා පමණක් නොව අග්‍රාමාත්‍ය කාර්යාලයේ ප්‍රධානියා ඇතුළු උසස් පරිපාලන නිලධාරීන් ගණනාවකට මෙම අපයෝජන සිද්ධිය නිසා තනතුරු අහිමි විය. 

ප්‍රජාතන්ත්‍රවාදී රාමුවක් තුල නීතියේ ආධිපත්‍ය සුරැකීම සහ සියලුම පුරවැසියන් නීතිය ඉදිරියේ සමාන වන්නේ කෙසේද යන්න මෙම සිදුවීම තුලින් පෙන්වා දෙනවාට අමතරව නීතිගරුක පාලකයින් විසින් තම තීන්දු තීරණ සහ ක්‍රියාවන් වල වගකීම භාර ගන්නා ආකාරයද පෙන්වා දෙයි. දෙමළ නඩුවෙන් වසර දහයකට පසු ඩෙන්මාර්කයේ පළවන යූලන්ඩ්ස්-පෝස්ටන් පුවත් පතට එරික් නීන් හැන්සන් මහතා ප්‍රකාශ කර සිටියේ කිසිදු සැකයකින් තොරව තමා විසින් ගනු ලැබූ තීන්දු තීරණ වල වගකීම භාර ගන්නා බවයි. 

*පොත පත ඇසුරින් සකස් කලේ ආචාර්ය නවින්ද්‍ර ද සොයිසා – ඩෙන්මාර්කය

Back to Home page