ලයනල් බෝපගේ –

යළි එළඹෙන හුරුපුරුදු කුණාටුවක්

2026 සැප්තැම්බර් මාසයේදී ශ්‍රී ලංකාවේ උද්ධමනය 8% දක්වා ඉහළ ගියේය. එය අඛණ්ඩව තුන්වන මාසයටත් මහ බැංකුවේ 3–7% ඉලක්ක පරාසයට ඉහළින් පැවතුණු අතර, විදේශයෙන් තවත් පීඩනයක් එල්ල වෙමින් තිබේ. ඔක්තෝබර් 19 වන දින බ්‍රෙන්ට් බොරතෙල් බැරලයක මිල එක්සත් ජනපද ඩොලර් 107ක් පමණ විය; එය වසරකට පෙර මිලට වඩා 75%ක් පමණ වැඩිය. පෙබරවාරි 28 වන දින ඉරානයට එරෙහිව එක්සත් ජනපදය සහ ඊශ්‍රායලය එල්ල කළ ප්‍රහාරවලින් ආරම්භ වූ යුද්ධය දැන් පුළුල් වී ඇත: හූති සටන්කාමීන් රියාද් ගුවන් තොටුපළට සහ සෞදි අරාබියේ තෙල් යටිතල පහසුකම්වලට ප්‍රහාර එල්ල කර ඇති අතර, හෝර්මුස් අවට තෙල් නැව්වලට ප්‍රහාර එල්ල වෙමින් පවතී; රුසියාව සහ යුක්රේනය අතර බලශක්ති සටන් විරාමය ද බිඳ වැටී ඇත.

ධනවත් ආර්ථිකයන්ට පවා මෙහි බලපෑම දැනෙමින් තිබේ. තෙල් බැරලයක මිල ඩොලර් 100ට වඩා ඉහළින් රැඳී පැවතීම නිසා උද්ධමනය සහ පොලී අනුපාත දිගු කලක් ඉහළ මට්ටමක පවතිනු ඇතැයි ඕස්ට්‍රේලියාවේ සංචිත බැංකුවේ ජ්‍යෙෂ්ඨ නිලධාරීන් බිය වන බව වාර්තා වේ. එම බැංකුවේම පුරෝකථන පදනම් වූයේ බැරලයකට ඩොලර් 20ක් දක්වා අඩු තෙල් මිලක් මතය. ඕස්ට්‍රේලියාවේ ඩීසල් මිල 2022 දී යුක්රේන යුද්ධය ආරම්භ වූ අවස්ථාවේ පැවති මට්ටමට ආසන්නව නැවත ඉහළ ගොස් ඇති අතර, ඉන්ධන පිරිවැය සහ එල් නිනෝ තත්ත්වය හේතුවෙන් ආහාර මිල ද ඉහළ යමින් පවතී.

විශාල සංචිත සහ තමන්ගේම ගෑස් සම්පත් ඇති ඕස්ට්‍රේලියාව පවා කනස්සල්ලට පත්ව සිටී නම්, ශ්‍රී ලංකාවට බිය වීමට ඊට වඩා බොහෝ හේතු ඇත. මෙරට භාවිත කරන සෑම තෙල් ලීටරයක්ම ආනයනය කරනු ලැබේ. සැබෑ ප්‍රශ්නය වන්නේ, කොළඹ මෙම අවස්ථාව එම යැපීම අඩු කර ගැනීමට යොදා ගන්නේද, නැතහොත් 2022 අර්බුදය තවත් උග්‍ර කළ කෙටිකාලීන විසඳුම් නැවතත් අනුගමනය කරන්නේද යන්නයි. සියල්ලටම වඩා, මෙම නව බර දරන්නේ කවුරුන්දැයි රජය සලකා බැලිය යුතුය. මන්ද, පසුගිය බර දැනටමත් දරා ඇත්තේ දුප්පත්ම ජනතාව වන බැවිනි.

ඈත යුද්ධ ලාංකේය මුළුතැන්ගෙය දක්වා

මෙම කම්පනය එකවර මාර්ග හතරක් ඔස්සේ රට තුළට පැමිණේ.

ඉන්ධන: ශ්‍රී ලංකාව සපුගස්කන්ද පිරිපහදුව සඳහා බොරතෙල් මැද පෙරදිගින් ද, පිරිපහදු කළ නිෂ්පාදන සිංගප්පූරුව, මැලේසියාව සහ දකුණු කොරියාවෙන් ද මිලදී ගනී. මාර්තු මාසයේදී හෝර්මුස් සමුද්‍ර සන්ධිය ප්‍රායෝගිකව වසා දැමුණු විට, සති කිහිපයක් ඇතුළත ඉන්ධන මිල තුනෙන් එකකට වඩා ඉහළ ගිය අතර, මැයි වන විට එය 50%කින් පමණ ඉහළ ගොස් තිබිණි. ඔක්තෝබර් 1 වන දින සිදු කළ තවත් මිල වැඩිවීමකින් පසු, පෙට්‍රල් 92 ලීටරයක මිල රු. 414ක් වන අතර ඔටෝ ඩීසල් ලීටරයක මිල රු. 392කි. ජාත්‍යන්තර මූල්‍ය අරමුදලේ (IMF) වැඩසටහන යටතේ, මෙම පිරිවැය සහනාධාර මගින් දැරීම වෙනුවට පාරිභෝගිකයන් වෙත පැවරිය යුතුය.

ප්‍රවාහනය සහ ආහාර: සහල්, එළවළු සහ මාළු දිවයින පුරා ප්‍රවාහනය කරන්නේ ඩීසල් මගිනි. සැප්තැම්බර් මාසයේදී ආහාර උද්ධමනය 8.7% දක්වා ද, මූලික උද්ධමනය 5.4% දක්වා ද ඉහළ ගියේය. ඉන්ධන පිරිවැය ඉන්ධන පිරවුම්හලෙන් ඔබ්බට ගොස් අනෙකුත් මිල ගණන් තුළට ද කාන්දු වෙමින් පවතින බවට එය සලකුණකි.

විදුලිය: තාප බලාගාර ආනයනික තෙල් සහ ගල් අඟුරු දහනය කරයි. ඉහළ ඉන්ධන බිල්පත් විදුලි ගාස්තු තුළට ඇතුළත් වන අතර, එමගින් සෑම බේකරියකම, ඇඟලුම් කර්මාන්තශාලාවකම සහ හෝටලයකම පිරිවැය ඉහළ යයි.

රුපියල: මාර්තු මාසයේ පමණක් ඉන්ධන ආනයන බිල එක්සත් ජනපද ඩොලර් මිලියන 630ක් දක්වා ඉහළ ගිය අතර, එය පෙර වසරට සාපේක්ෂව 75%ක වැඩිවීමකි. ඩොලර් සඳහා වූ මෙම අතිරේක ඉල්ලුම, වසරේ පළමු මාස නවය තුළ එක්සත් ජනපද ඩොලරයට සාපේක්ෂව රුපියල 6.3%කින් අවප්‍රමාණය වීමට දායක විය. දුර්වල රුපියලක් නිසා පිටි සිට ඖෂධ දක්වා සෑම ආනයනයකම මිල ඉහළ යයි.

යුක්රේන යුද්ධය ඩීසල්, පොහොර සහ ධාන්‍ය වෙළඳපොළවල් හරහා අමතර පීඩනයක් එක් කරයි. ඉහළ නැව් ගාස්තු සහ යුද අවදානම් රක්ෂණ ගාස්තු නිසා දිවයිනක් වන ආර්ථිකයකට නැව් මගින් ගෙන එන සෑම දෙයකම පිරිවැය ඉහළ යයි. එමෙන්ම, එල් නිනෝ තත්ත්වය වී අස්වැන්නට මෙන්ම ජල විදුලි නිෂ්පාදනයට ද තර්ජනයක් වේ.

මිල ගෙවන ජනතාව

මිලියන ගණනක් ශ්‍රී ලාංකිකයන්ට මෙය නව කම්පනයක් නොව, පළමු තුවාලය සුව වීමටත් පෙර එල්ල වූ දෙවන පහරයි. 2022 අර්බුදය උද්ධමනය 70%කට ආසන්න මට්ටමකට තල්ලු කළ අතර, දරිද්‍රතාව දළ වශයෙන් දෙගුණ කරමින් ජනගහනයෙන් හතරෙන් එකක් පමණ දක්වා ඉහළ නැංවීය. මිල ගණන් කිසි විටෙක ඒවායේ පැරණි මට්ටම්වලට පහළ බැස නැත; සිදු වී ඇත්තේ ඒවා ඉහළ යන වේගය අඩු වීම පමණි. වැටුප්, විශ්‍රාම වැටුප් සහ දෛනික ආදායම් තවමත් ඊට සමගාමීව ඉහළ ගොස් නැත.

වැඩිපුරම පීඩාවට පත්ව සිටින්නේ වෙනස්වන තත්ත්වයන්ට අනුගත වීමට අවම හැකියාවක් ඇති අයයි. දෛනික වැටුප් ලබන කම්කරුවන්, මලෙයහ පවුල්, භූමිතෙල් සහ ඩීසල් සඳහා වැඩි මුදලක් ගෙවන ධීවරයන්, මිල අධික පොහොර සහ ප්‍රවාහන පිරිවැයට මුහුණ දෙන ගොවීන් සහ ස්ථාවර ආදායම් මත යැපෙන විශ්‍රාමිකයන් ඒ අතර වෙති. දුප්පත් පවුල් තම ආදායමෙන් වැඩි කොටසක් වැය කරන්නේ ආහාර, ඉන්ධන සහ බස් ගාස්තු සඳහා ය. තෙල් කම්පනයකදී මුලින්ම ඉහළ යන්නේ හරියටම එම මිල ගණන්ය.

මෙම පවුල් අතිශයින් ඉවසීමෙන් කටයුතු කර ඇත. තම ජීවන තත්ත්වය ඉක්මනින් යහපත් වනු ඇතැයි යන බලාපොරොත්තුවෙන් ඔවුන්ගෙන් බොහෝ දෙනෙක් 2024 දී වෙනසක් සඳහා ඡන්දය දුන්හ. කිසිදු පැහැදිලි සහනයක් නොමැතිව තවත් මිල වැඩිවීම් වටයක් පැමිණියහොත්, එය ඔවුන්ගේ ඉවසීමත්, ඕනෑම ප්‍රතිසංස්කරණයක් රඳා පවතින සමාජ විශ්වාසයත් පරීක්ෂාවට ලක් කරනු ඇත.

දිගුකාලීන පීඩනය වැඩි කළ කෙටිකාලීන විසඳුම්

වසර පහක තහනමකින් පසු 2025 පෙබරවාරියේදී වාහන ආනයනය නැවත ආරම්භ කිරීම ජනප්‍රිය වූ අතර, එමගින් තීරු බදු ආදායමෙන් භාණ්ඩාගාරය පිරී ගියේය. නමුත් ඒ සඳහා වැය වූ විදේශ විනිමය ප්‍රමාණය විශාලය. 2025 දී වාහන සඳහා එක්සත් ජනපද ඩොලර් බිලියන 2කට ආසන්න මුදලක් වැය වූ අතර, එය පුරෝකථනය කළ ඩොලර් බිලියන 1.5–1.7 ප්‍රමාණයට වඩා සැලකිය යුතු ලෙස වැඩිය. තෙල් මිල වේගයෙන් ඉහළ යමින් තිබියදීත්, 2026 පළමු භාගයේදී තවත් ඩොලර් බිලියන 1.25ක් වැය විය.

රජය මැයි මාසයේදී වාහන ආනයන තීරු බදු මත 50%ක තාවකාලික අතිරේක බද්දක් පනවමින් ප්‍රතිචාර දැක්වීය. එක් මාසයක් තුළ වියදම 27%කින් අඩු වී ජූනි මාසයේදී ඩොලර් මිලියන 182ක් දක්වා පහත වැටුණි. මෙම ක්‍රියාමාර්ගය ඵලදායී බව එයින් පෙනේ. නමුත් එය උපාය මාර්ගයක් නොව, ප්‍රතිචාරයක් පමණි.

ගැඹුරු ගැටලුව වන්නේ ආනයනය කරනු ලබන්නේ කුමක්ද යන්නයි. නව වාහන බොහොමයක් ධාවනය වන්නේ පෙට්‍රල් හෝ ඩීසල් මගිනි. එක් එක් වාහනය වසර 15ක් හෝ ඊට වැඩි කාලයක් සඳහා ඉන්ධන ඉල්ලුමක් ස්ථිර කරයි. ඇත්ත වශයෙන්ම, රට හිඟ ඩොලරයක් දෙවරක් වියදම් කරයි: වරක් මෝටර් රථය සඳහා ද, ඉන් පසු සෑම මසකම එය ධාවනය කිරීමට අවශ්‍ය ඉන්ධන සඳහා ද වශයෙනි.

මෙය ආකාර දෙකකින් උද්ධමනයට දායක වේ. එය විදේශ විනිමය ක්ෂය කරමින් රුපියල දුර්වල කරයි. එමෙන්ම, තෙල් මිල ඉහළම මට්ටමේ පවතින අවස්ථාවේදීම ජාතික තෙල් බිල ඉහළ නංවයි. ආදායම් ඉලක්ක සපුරා ගැනීම සඳහා වාහන බදු මත යැපීම නිසා, මුදල් ඒකකය අස්ථාවර කරන එම ආනයනවලටම අයවැය ප්‍රාණ ඇපයක් බවට පත් වේ.

මඟහැරී යන පුනර්ජනනීය බලශක්ති අවස්ථාවක්

ශ්‍රී ලංකාවට වසර පුරා හිරු එළිය, ප්‍රබල සුළං, සාගර ධාරා සහ දිගු ජල විදුලි සම්ප්‍රදායක් ඇත. ජාතික විදුලිබල පද්ධතියේ විදුලියෙන් අඩකට වඩා දැනටමත් සපයනු ලබන්නේ පුනර්ජනනීය බලශක්ති මගින් වන අතර, 2030 වන විට ජාතික ඉලක්කය 70%කි. 2025 වසර තුළ වහල මත සවි කළ සූර්ය බලශක්ති ධාරිතාව, සම්බන්ධතා 109,000කට ආසන්න ප්‍රමාණයක් හරහා මෙගාවොට් 1,141 සිට මෙගාවොට් 1,935 දක්වා වර්ධනය විය.

එහෙත් රජයේ ප්‍රතිපත්ති, පවුල් සහ ආයෝජකයන්ට වඩා පසුපසින් සිටී. නව වහල මත සූර්ය සම්බන්ධතා සඳහා ශුද්ධ මිනුම් (net metering) ක්‍රමය වසා දමා ඇති අතර, විදුලිය මිලදී ගැනීමේ ගාස්තු (feed-in tariffs) කපා හැර ඇත. අඩු ඉල්ලුමක් ඇති දිනවල විදුලිබල පද්ධතියේ ස්ථායිතාව හේතු කොට දක්වමින්, අප්‍රේල් මාසයේදී කිලෝවොට් 300ට වැඩි වහල මත සූර්ය පද්ධති දින දහයක් ක්‍රියා විරහිත කිරීමට නියෝග කෙරිණි. දේශීයව නිපදවන සෑම කිලෝවොට්–පැයක්ම ආනයනික ඉන්ධන ඉතිරි කරන මෙවැනි අවස්ථාවක, නිරන්තරයෙන් වෙනස් වන නීතිරීති නිසා කුඩා ආයෝජකයන් ප්‍රවේශම් වෙති.

බාධකය වන්නේ හිරු එළිය නොව, විදුලිබල පද්ධතියයි. බලශක්ති ගබඩා කිරීම ප්‍රමාද වී ඇත: අනුරාධපුරයේ පිහිටි මෙගාවොට් 10/මෙගාවොට්–පැය 40 ධාරිතාවකින් යුත් පළමු පද්ධති–පරිමාණ බැටරිය ජාතික පද්ධතියට සම්බන්ධ කළේ 2026 සැප්තැම්බරයේදී පමණි. තවත් බැටරි දොළහක් මාස කිහිපයක් ඇතුළත සම්බන්ධ කිරීමට නියමිත අතර, මෙගාවොට් 250 බැටරි ටෙන්ඩරයක් ද ක්‍රියාත්මක වෙමින් පවතී. මෙගාවොට් 600 මහ ඔය පොම්ප ගබඩා ව්‍යාපෘතිය 2030 දශකයට පෙර නිම වනු ඇතැයි අපේක්ෂා නොකෙරේ. මේ අතර, 2024 විදුලිබල පනත යටතේ විදුලිබල අංශය ප්‍රතිව්‍යුහගත කිරීම තවමත් ස්ථාවර වෙමින් පවතී.

ප්‍රමාදයේ පිරිවැය පහසුවෙන්ම දැකගත හැකිය. දහවල් කාලයේ සීමා කරනු ලබන සෑම සූර්ය විදුලි ඒකකයක්ම, සවස් කාලයේදී ඩොලර්වලින් මිලදී ගත් තෙල් හෝ ගල් අඟුරු දහනය කිරීමෙන් ප්‍රතිස්ථාපනය කළ යුතු වේ.

ජාතික ජන බලවේග (NPP) රජයට දැන් කළ හැකි දේ

ධනවාදී රාමුවක් තුළ වුවද ක්‍රමය වෙනස් කිරීමේ පොරොන්දුව මත ජාතික ජන බලවේගය බලයට පත් විය. එය සනාථ කිරීමට මෙම අර්බුදය අවස්ථාවක් වේ. දුෂ්කරතාවට පත් පවුල් සඳහා සහන මුලින්ම ලබා දිය යුතුව තිබෙන අතර, ඉන් අනතුරුව මාස කිහිපයක් ඇතුළත මිල පීඩනය ලිහිල් කරන සහ වසර ගණනාවක් පුරා අවදානම අඩු කරන පියවර ගත යුතුව ඇත.

1. ජීවන වියදම් බර දැන්ම ලිහිල් කිරීම: අස්වැසුම ගෙවීම් පුළුල් කර ඒවා ඉන්ධන සහ ආහාර මිල සමඟ සම්බන්ධ කිරීම; එවිට පිරිවැය ඉහළ යන විට සහාය ද ස්වයංක්‍රීයව ඉහළ යනු ඇත. අඩු විදුලි පරිභෝජනයක් ඇති පාරිභෝගිකයන් සඳහා සහනදායී මූලික විදුලි ගාස්තුවක් පවත්වා ගැනීම; පෝෂ්‍යදායී පාසල් ආහාර වෙනුවෙන් අරමුදල් සැපයීම; තවද, ධීවරයන්ට සහ ගොවීන්ට භූමිතෙල්, ඩීසල් සහ පොහොර සඳහා ඉලක්කගත සහාය ලබා දෙමින්, තොග සැඟවීම සහ අයුතු ලාභ ඉපයීමට එරෙහිව දැඩි ලෙස ක්‍රියා කරන අතර, කම්කරුවන් සහ සිසුන් සඳහා බස් ගාස්තු දැරිය හැකි මට්ටමක පවත්වා ගැනීම.

2. බලශක්තිය විදේශ විනිමය ප්‍රතිපත්තියක කොටසක් ලෙස සැලකීම: පුනර්ජනනීය බලශක්තිය සහ බලශක්ති කාර්යක්ෂමතාව හරහා වළක්වා ගන්නා ඉන්ධන ආනයන සඳහා වාර්ෂික ඉලක්කයක් සැකසීම. භාණ්ඩාගාරය සහ මහ බැංකුව විදේශ සංචිත සමඟම එම ඉලක්කය ද නිරීක්ෂණයට ලක් කිරීම.

3. බලශක්ති ගබඩා කිරීම සහිත වහල මත සූර්ය බලශක්තිය නැවත විවෘත කිරීම: කුඩා පද්ධති සඳහා ස්ථාවර, දිගුකාලීන ගාස්තුවක් පිරිනැමීම; සවස ඉහළ ඉල්ලුම් පවතින විට බැටරි සහාය ඇතිව ජාතික පද්ධතියට සපයන විදුලිය සඳහා අතිරේක ගාස්තුවක් ලබා දීම; පවුල්වලට සහ කුඩා ව්‍යාපාරවලට රාජ්‍ය බැංකු හරහා සහනදායී පොලී අනුපාත යටතේ සූර්ය පැනල සඳහා ණය ලබා ගැනීමට ඉඩකඩ ලබා දීම. අඩු ආදායම් ලාභී පවුල්වලට ද ඉතිරිකිරීම්වල ප්‍රතිලාභ ලැබෙන පරිදි ප්‍රජා සූර්ය බලශක්ති යෝජනා ක්‍රම හඳුන්වා දීම.

4. විදුලිබල පද්ධතිය සංවර්ධනය කිරීම වේගවත් කිරීම: ප්‍රාදේශීය ජනතාවට, ඔවුන්ගේ නිවාසවලට, ජීවනෝපායන්ට සහ නොකැළැල් පරිසරයට හානි නොවන පරිදි, සුදුසු ප්‍රදේශවලින් විදුලි සම්ප්‍රේෂණයට ප්‍රමුඛත්වය දීම; මෙගාවොට් 250 බැටරි ටෙන්ඩරය නියමිත කාලසටහනට අනුව පවත්වා ගැනීම; පොම්ප ගබඩා ව්‍යාපෘතිය ඉක්මන් කිරීම. වහල මත සූර්ය නිෂ්පාදනය සම්පූර්ණයෙන්ම ක්‍රියා විරහිත කරනවා වෙනුවට එම නිෂ්පාදනය අඩු කළ හැකි වන පරිදි ස්මාර්ට් ඉන්වර්ටර් අනිවාර්ය කිරීම.

5. ඉන්ධන ඉතිරිකිරීම දිරිමත් කරන පරිදි වාහන බදු සකස් කිරීම: තාවකාලික අතිරේක බද්ද වෙනුවට, ඉන්ධන කාර්යක්ෂමතාව සහ විමෝචන මට්ටම් මත පදනම් වූ ස්ථිර තීරු බදු ක්‍රමයක් හඳුන්වා දීම. විදුලි බස් රථ, ත්‍රිරෝද රථ සහ යතුරුපැදිවලට ප්‍රමුඛත්වය දෙන අතර, වැඩි ඉන්ධන ප්‍රමාණයක් පරිභෝජනය කරන විශාල එන්ජින් සඳහා වැඩි බද්දක් අය කිරීම.

6. පොදු ප්‍රවාහනය සඳහා ආයෝජනය කිරීම: බස් රථ සමූහය පුළුල් කිරීමට සහ විදුලිකරණය කිරීමටත්, දුම්රිය ධාරිතාව යළි ගොඩනැගීමටත් වාහන තීරු බදු ආදායමෙන් කොටසක් යෙදවීම; රාජ්‍ය බස් සහ දුම්රිය සේවාවල නොමිලේ ගමන් කිරීමේ හැකියාව පිළිබඳව සොයා බැලීම; මගීන්ගෙන් පිරුණු එක් බස් රථයක් මගින් මෝටර් රථ දුසිම් ගණනක් මාර්ගයෙන් ඉවත් කරනු ලබන අතර, එය පරිසර දූෂණය අඩු කර, දිගුකාලීන සෞඛ්‍ය සහ පාරිසරික පිරිවැය ද අඩු කර ලයි. එමෙන්ම, කිසිසේත් මෝටර් රථයක් අත් කර ගත නොහැකි අයට ද එය සේවය සපයයි.කරයි.

7. ආරක්ෂිත සංචිතයක් ගොඩ නඟා, කල් ඇතිව ජනතාවට දැනුම් දීම: විවිධ සැපයුම්කරුවන් සමඟ නිශ්චිත කාලීන සැපයීමේ ගිවිසුම් සාකච්ඡා කිරීම; ත්‍රිකුණාමලය තෙල් ටැංකි සංකීර්ණයේ ගබඩා ධාරිතාව පුළුල් කිරීම; සහ IMF සමඟ එකඟ වූ නීතිරීති තුළ විනිවිද පෙනෙන මිල ස්ථායීකරණ යාන්ත්‍රණයක් ක්‍රියාත්මක කිරීම. පවුල්වලට සහ ආයෝජකයන්ට සැලසුම් කළ හැකි වන පරිදි පැහැදිලි බලශක්ති සුරක්ෂිතතා මාර්ග සිතියමක් ප්‍රකාශයට පත් කිරීම.

මේ කිසිවක් සඳහා IMF වැඩසටහන අත්හැරීම අවශ්‍ය නොවේ. දිගුකාලීන සහ ඵලදායී සැලසුම්කරණය, පිරිවැය පිළිබිඹු කරන මිලකරණය සහ රාජ්‍ය මූල්‍ය විනය පවත්වා ගැනීම පිරිවැය අඩු කිරීමේ ක්‍රියාමාර්ග සමඟ හොඳින් ගැළපේ.

දුෂ්ට චක්‍රය බිඳ දැමීම

ගල්ෆ් කලාපයේ, යුක්රේනයේ හෝ වෙනත් කිසියම් තැනක යුද්ධ නැවැත්වීමට ශ්‍රී ලංකාවට හැකියාවක් නැත. නමුත් ඒවායේ බලපෑමට රට කොතරම් නිරාවරණය වී සිටිය යුතුද යන්න තීරණය කිරීමට එයට හැකිය. සෑම වහලක් මත සවි කළ සූර්ය පැනලයක්ම, බැටරියක්ම සහ විදුලි බස් රථයක්ම, ආනයන බිල සහ ඒ හා බැඳුණු උද්ධමනය කුඩා නමුත් ස්ථිර ලෙස අඩු කිරීමකට මඟ පාදයි. අතිරේක බදු සහ ඉන්ධන මිල සූත්‍ර විසින් කාලය ලබා දෙයි. එතරම් ඉවසීමෙන් බලා සිටි ජනතාව ආරක්ෂා කිරීමටත්, ඊළඟ තෙල් කම්පනයට බිඳ දැමිය නොහැකි අන්දමේ සුරක්ෂිත බලශක්ති පද්ධතියක් ගොඩනැගීමටත් ජාතික ජන බලවේග ආණ්ඩුව එම කාලය යොදා ගත යුතුය. ඔවුන්ගේ බලාපොරොත්තු ආණ්ඩුවේ ප්‍රබලතම ජනවරමයි; ඒවා ඉටු කිරීම ආණ්ඩුවේ වඩාත්ම හදිසි කාර්යයයි.