21 November, 2026

Blog

දේශපාලන පොරොන්දුවල සිට ජාතික විශ්වාසය දක්වා

ජෙහාන් පෙරේරා –

ජෙහාන් පෙරේරා

ත්‍රස්තවාදයෙන් රාජ්‍යය ආරක්ෂා කිරීමේ පනත් කෙටුම්පත සහ සංවිධානාත්මක අපරාධ වැළැක්වීමේ පනත් කෙටුම්පත සම්බන්ධයෙන් ආණ්ඩුව කඩිනමින් කටයුතු නොකරන බවට ජනාධිපති අනුර කුමාර දිසානායක පසුගිය සතියේ කළ නිවේදනය වඩාත් දිරිගන්වනසුලු වර්ධනයකි. මතභේදයට තුඩු දී ඇති මෙම නීති කෙටුම්පත් නැවත සලකා බැලීමට ආණ්ඩුව දක්වන කැමැත්ත තුළින්, ‘ක්‍රමයේ වෙනසක්’ (System Change) සඳහා වන කැපවීම ප්‍රායෝගිකව ක්‍රියාත්මක වීමට පටන් ගෙන තිබේද යන්න තක්සේරු කිරීමට අවස්ථාවක් සැලසේ. මෙම වර්ධනයන් මගින් පෙන්නුම් කරන්නේ, විවේචනවලට ඇහුම්කන් දීමටත්, අභියෝගයට ලක්වූ යෝජනා ජාතික අවශ්‍යතාව මත නැවත සලකා බැලීමටත් ආණ්ඩුව සූදානම් බවයි. එසේම, ක්‍රමයේ වෙනසක් යන්න රජයට පමණක් සීමා විය නොහැකි බවට වන පුළුල් අවබෝධය ද එමගින් පිළිබිඹු වේ.

ජාතික වෘත්තීය සමිති සමුළුව අමතමින් ජනාධිපතිවරයා පැවසුවේ, යෝජිත නීති මගින් මානව හිමිකම් සහ මූලික අයිතිවාසිකම්වලට ඇතිවිය හැකි බලපෑම පිළිබඳව කනස්සල්ල පළකළ පාර්ශ්වයන් සමඟ ආණ්ඩුව පළමුව පුළුල් සාකච්ඡා පවත්වන බවයි. පුළුල් සම්මුතියක් ඇතිකර ගැනීම සඳහා සිවිල් සමාජ සංවිධාන සහ අනෙකුත් අදාළ පාර්ශ්වකරුවන්ගෙන් අදහස් විමසන බව ද ඔහු පැහැදිලි කළේය. මෙම පනත් කෙටුම්පත් දෙක සමඟ යෝජිත රාජ්‍ය නොවන සංවිධාන (NGO) පනතට ද දැනටමත් කැබිනට් අනුමැතිය ලැබී තිබූ බැවින් සහ ඒවා මානව හිමිකම් සංවිධාන, සිවිල් සමාජ කණ්ඩායම් සහ වෙනත් පාර්ශ්වකරුවන් අතර දැඩි කනස්සල්ලක් ඇතිකර තිබූ බැවින් මෙම නිවේදනය අතිශයින් වැදගත් වේ.

මෙම නීති කෙටුම්පත් තුනම තවදුරටත් පරීක්ෂාවට සහ සංශෝධනයට ලක්කරන බව රජය දැන් ඇඟවුම් කර තිබේ. මෙතරම් පුළුල් විවේචනයකට ලක් වූ යෝජනා නැවත සලකා බැලීමට ඇති කැමැත්ත ධනාත්මක වර්ධනයකි. ක්‍රමයේ වෙනසක් සඳහා රජය දක්වන කැපවීමත් සමඟ පාලක පක්ෂය අතට බලය කේන්ද්‍රගත වීමක් සිදුවේ යැයි බිය වූ අයට එය සහනයක් විය යුතුය. ප්‍රජාතන්ත්‍රවාදී පාලනයකට නීති පැනවීමේ හැකියාව පමණක් නොව, යෝජිත නීති ප්‍රජාතන්ත්‍රවාදී සම්මතයන්ට සහ මූලික අයිතිවාසිකම්වලට පටහැනි වනවිට එය හඳුනාගැනීමේ කැමැත්ත ද අවශ්‍ය වේ. අතීතයේ මෙන් ආත්මාර්ථකාමී හෝ පක්ෂ අවශ්‍යතා වෙනුවට ජාතික අවශ්‍යතාව වෙනුවෙන් කැපවීමක් ඇති බව ඍණාත්මක නීති නැවත සලකා බැලීමට දක්වන කැමැත්තෙන් පෙන්නුම් කෙරේ.

ක්‍රිකට් ක්‍රීඩාව වෙනස්කිරීම

පසුගිය පාලනයන්ට සාක්ෂාත් කර ගැනීමට අපහසු වූ ධනාත්මක ප්‍රතිසංස්කරණයක් දෙසට ගමන් කිරීමක් ද පසුගිය සතියේ දක්නට ලැබිණි. ශ්‍රී ලංකා ක්‍රිකට් ආයතනයේ පාලනය ප්‍රතිසංස්කරණය කිරීම සඳහා යෝජිත නීති කෙටුම්පතට ශ්‍රේෂ්ඨාධිකරණයේ හිතකර තීරණය ලැබී ඇති අතර, වගන්ති දෙකක සංශෝධනවලට යටත්ව එය පාර්ලිමේන්තුවේදී සම්මත කර ගැනීමට මාවත විවර වී තිබේ. ක්‍රිකට් පරිපාලනය ප්‍රතිසංස්කරණය කිරීමට ගත් උත්සාහයන්ට, මුල් බැසගත් පටු අවශ්‍යතාවලින් නිරන්තරයෙන් බාධා එල්ල වූ බැවින් මෙය විශේෂයෙන් වැදගත් වර්ධනයකි. හිටපු ජාතික ක්‍රිකට් ක්‍රීඩකයෝ කිහිපදෙනෙක් සහ තවත් පිරිස් මෙම පනත් කෙටුම්පතට සහාය පළකරමින් මැදිහත් වූහ. කෙටුම්පත් නීතිය සකස් කළ ක්‍රිකට් පරිවර්තන කමිටුවේ සාමාජිකයකු ද වන හිටපු ශ්‍රී ලංකා ආරම්භක පිතිකරු සිදත් වෙත්තමුණි ද මෙම වෙනස ඇතිකිරීමට ජනාධිපතිවරයා දක්වන කැපවීමේ වැදගත්කම පිළිගෙන තිබේ.

ශ්‍රේෂ්ඨාධිකරණයේ තීරණය වැදගත් වන්නේ, එය නීති සම්පාදනයට මාවත විවර කරන නිසා පමණක් නොව, ක්‍රිකට් පාලනය සඳහා එම ක්‍රීඩාවට ආවේණික විශේෂිත තත්ත්වයන්ට අනුකූල ප්‍රතිචාරයක් අවශ්‍ය බව පිළිගන්නා බැවිනි. ක්‍රිකට් ක්‍රීඩාවේ ඇති සුවිශේෂී ජනප්‍රියත්වය, අන්තර්ජාතික බැඳීම්, මූල්‍ය පරිමාණය සහ දූෂණයට ඇති නිරාවරණය හේතුවෙන් ඊට වෙනම ව්‍යවස්ථාපිත රාමුවක් අවශ්‍ය වන බව අධිකරණය පිළිගත්තේය. නැවත නැවතත් පත්කළ අතුරු කමිටු සහ ආයතනය ප්‍රතිසංස්කරණය කිරීමට ගත් අසාර්ථක උත්සාහයන්ගේ ඉතිහාසය ද අධිකරණය සැලකිල්ලට ගත්තේය. අධිකරණයේ තර්කය වූයේ ක්‍රිකට් ක්‍රීඩාවේ විශේෂිත තත්ත්වයන්ට විශේෂ ව්‍යවස්ථාදායක සැලකිල්ලක් අවශ්‍ය බවයි. මෙය, මහජන යහපතට සේවය කිරීමට අපොහොසත් වූ ස්ථාපිත විධිවිධාන ජයගැනීමට ඇතැම් විට ප්‍රතිසංස්කරණ අවශ්‍ය බවට වන වැදගත් පිළිගැනීමක් වේ.

යෝජිත නීතිවලට එල්ලවන විරෝධතාවලට ඇහුම්කන් දීමට සහ ක්‍රිකට් සම්බන්ධයෙන් පවතින පටු අවශ්‍යතා ජයගැනීමට දක්වන කැමැත්ත, නිර්මාණාත්මක හා පරිවර්තනීය ක්‍රමයේ වෙනසක් සඳහා වන කැපවීමේ ධනාත්මක දර්ශකයන්ය. රටේ දීර්ඝතම සහ විසඳීමට අපහසුම ගැටලුව වන ජනවාර්ගික ගැටුමට රාජ්‍යය මුහුණදෙන ආකාරය දක්වා ද මෙය ව්‍යාප්ත විය යුතුය. මෙම ගැටුමේ වඩාත් වේදනාකාරී සහ ඛේදනීය අංගයක් වන්නේ අතුරුදහන් වූ හෝ බලහත්කාරයෙන් අතුරුදහන් කරනු ලැබූ දහස්ගණනකගේ නොවිසඳුණු ඉරණමයි. තම ආදරණීයයන්ට සිදුවූයේ කුමක්දැයි නොදැන ඔවුන්ගේ පවුල් තවමත් අවිනිශ්චිතතාවයෙන් ජීවත් වෙති. බොහෝදෙනෙකුට සත්‍යය සෙවීම ජීවිත කාලය පුරාම කරන අරගලයක් බවට පත්ව ඇත. රටේ ප්‍රතිසංස්කරණ ව්‍යාපාරය ආණ්ඩුවෙන් ඔබ්බට ගොස් සමස්ත රාජ්‍යයම ආවරණය කිරීමට පටන් ගෙන ඇති බවට වැදගත් සලකුණක්, පසුගිය සතියේ මාතර සහ යාපනයේදී සිවිල් සමාජ සාමාජිකයන් සහ දිස්ත්‍රික් රජයේ නිලධාරීන් සමඟ වැඩමුළු දෙකකට සහභාගී වූ අතුරුදහන් වූ තැනැත්තන් පිළිබඳ කාර්යාලය යළි සක්‍රීය වීම තුළින් දැකගත හැකිය.

අතුරුදහන් වූ තැනැත්තන් පිළිබඳ කාර්යාලය (OMP) යනු පද්ධතියක කොටසක් මිස තනි ආයතනයක් නොවේ. ඊට නඩු පැවරීමට හෝ වන්දි ලබාදීමට නොහැකි අතර, ඒවා පිළිවෙළින් නීතිපති දෙපාර්තමේන්තුවට සහ හානිපූරණය සඳහා වන කාර්යාලයට අයත් කාර්යයන් වේ. ඊට කළ හැක්කේ විමර්ශනය කර සිය සොයාගැනීම් එම ආයතන වෙත යොමුකිරීම පමණි. පීඩාවට පත්වූවන්ට තමන් වෙත පැමිණිය හැකි බව දැනගැනීම සඳහා පණිවිඩය පතුරුවා හැරීමට වෙනත් ආයතනවල, සමාජයේ සහ සිවිල් සමාජ සංවිධානවල සහාය ඊට අවශ්‍ය වේ. මාතර සහ යාපනයේ පැවති වැඩමුළු මගින් මෙම කාර්යයට අවශ්‍ය සබඳතා ගොඩනඟා ගැනීම සඳහා OMP, සිවිල් සමාජය සහ රජයේ නිලධාරීන් එකට එක්කිරීමේ වටිනාකම පෙන්නුම් කළේය. තවත් බොහෝ වැඩ කොටසක් ඉතිරිව තිබේ. මෙම පහසුකම තිබෙන බව නොදන්නා නිසා හෝ ඒ පිළිබඳ විශ්වාසයක් නොමැති නිසා හෝ තම අතුරුදහන් වූ ඥාතීන් පිළිබඳව පැමිණිලි නොකළ වින්දිත පවුල් තවත් සිටිති. වැඩි තොරතුරු සහ වැඩි විශ්වාසයක් අවශ්‍ය වන අතර, ක්‍රියාවලිය ආරම්භ කිරීම සඳහා OMP වෙත පැමිණිල්ලක් ඉදිරිපත් කළ යුතු බව ජනතාවට දැනුම්දිය යුතුය.

දේශපාලන කැපවීම

බලහත්කාරයෙන් හෝ ස්වේච්ඡාවෙන් අතුරුදහන් කිරීම් පිළිබඳ එක්සත් ජාතීන්ගේ ක්‍රියාකාරී කණ්ඩායම විසින් වාර්තා කර ඇති නොවිසඳුණු අතුරුදහන් වීම් සංඛ්‍යාව අතින් ඉරාකයට පසුව දෙවැනි ස්ථානයේ පසුවන්නේ ශ්‍රී ලංකාවයි. අතුරුදහන් වූ සහ බලහත්කාරයෙන් අතුරුදහන් කරනු ලැබූ පුද්ගලයන් පිළිබඳ ගැටලුව සිංහල, දෙමළ හෝ මුස්ලිම් වේවා ශ්‍රී ලංකාවේ සියලුම ප්‍රජාවන්ට බලපාන අතර එය රටේ ඉතිහාසයේ විවිධ කාල පරිච්ඡේද පුරා විහිදේ. ජාතික සාම මණ්ඩලය විසින් OMP සමඟ එක්ව මාතර සහ යාපනයේදී සිවිල් සමාජ සංවිධාන සහ දිස්ත්‍රික් මට්ටමේ රජයේ නිලධාරීන් සඳහා සංවිධානය කරන ලද දැනුවත් කිරීමේ සහ ගැටලු හඳුනා ගැනීමේ වැඩමුළු දෙකේදී මෙය පැහැදිලි විය. මෙම අවස්ථා දෙකේදීම දිස්ත්‍රික් ලේකම්වරු පෞද්ගලිකවම සහභාගී වී OMP හි කටයුතුවලට සහාය වන ලෙස තම දිස්ත්‍රික්කවල රජයේ නිලධාරීන් දිරිමත් කළහ. රටේ කැළඹිලි සහිත ඉතිහාසයේ විවිධ කාලපරිච්ඡේදවලදී වුවද, මෙම දිස්ත්‍රික්ක දෙකම විශාල අතුරුදහන් වීම් සංඛ්‍යාවකට මුහුණ දී ඇත.

කිසිදු ආයතනික වාර්තාවකට හෝ නිල සංඛ්‍යාලේඛනයකට ප්‍රමාණවත් ලෙස ප්‍රකාශ කළ නොහැකි ආකාරයෙන් මෙම ගැටලුවේ මානුෂීය වැදගත්කම වැඩමුළුවල පැවති සාකච්ඡාවලදී ඉස්මතු විය. මාතර වැඩමුළුවේදී, අතුරුදහන්වීමකින් පීඩාවට පත් පවුලක, දැන් වයෝවෘද්ධව සිටින කාන්තාවක් පසුගිය වසර 37 පුරා තම පවුල කළ කැපකිරීම් ගැන කතාකළාය. ජාතික ජන බලවේග ආණ්ඩුව අද කිරීමට උත්සාහ කරන දේ වෙනුවෙන් පෙනීසිටීම නිසා තම සැමියාට ජීවිතය අහිමි වූ බව ඇය පැවසුවාය. ඇගේ අදහසට අනුව, වත්මන් ආණ්ඩුව බලයට පත්වූයේ තම පවුල සහ ඔවුන් වැනි අය කළ කැපකිරීම් නිසාය. ආණ්ඩුව මෙම දායකත්වය හඳුනාගෙන වඩා හොඳ රටක් වෙනුවෙන් අරගල කළ අයගේ දුක් වේදනා පිළිගත යුතු බව ඇය අපේක්ෂා කළාය. යාපනයේ පැවැති වැඩමුළුවේදී වින්දිත පවුලක සාමාජිකයකු පැවසුවේ OMP හි කොමසාරිස්වරියක ද, තම සැමියා අතුරුදහන් වූ වින්දිත ප්‍රජාවෙන්ම පැමිණි අයෙකු වීම ගැන තමා සතුටු වන බවත්, ඒ නිසා පවුල්වලට ඇය කෙරෙහි වැඩි සමීපතාවයක් දැනෙන බවත්ය.

ජනවාර්ගික ගැටුමේ තුවාල සුවපත් කිරීම සහ සාමකාමී හා සාධාරණ මාර්ග ඔස්සේ තිරසාර දේශපාලන විසඳුමක් ගෙන ඒම තවමත් නිම නොවූ අභියෝගයකි. ශ්‍රී ලංකා ක්‍රිකට් ආයතනය තුළ සිදුවෙමින් පවතින වෙනස පෙන්නුම් කරන්නේ දේශපාලන කැපවීමක් සහ පටු අවශ්‍යතා ජයගැනීමේ කැමැත්තක් ඇති විට වෙනස් කිරීමට අපහසු යැයි සැලකෙන ආයතන පවා ප්‍රතිසංස්කරණය කළ හැකි බවයි. පටු අවශ්‍යතා ජයගැනීම පිළිබඳව ක්‍රිකට් ක්‍රීඩාව ප්‍රයෝජනවත් නිදසුනක් සපයන නමුත්, ක්‍රීඩා ආයතනයක් ප්‍රතිසංස්කරණය කිරීම යනු රාජ්‍ය ආයතන පරිවර්තනය කිරීමට සහ ඓතිහාසික අසාධාරණයන්ට විසඳුම් සෙවීමට වඩා බෙහෙවින් වෙනස් කාර්යයකි. ඊට පටු අවශ්‍යතා ජයගැනීමට වඩා වැඩි යමක් අවශ්‍ය වේ. මුල් බැසගත් බල සබඳතාවලට මුහුණදීමට, ආයතනික සංස්කෘතීන් වෙනස් කිරීමට, අර්ථවත් වගවීමක් ස්ථාපිත කිරීමට සහ බැහැර කිරීමේ රටාවන් බිඳදැමීමට ඇති කැමැත්ත ඊට අවශ්‍ය වේ. ක්‍රමයේ වෙනසක සැබෑ මිනුම වනුයේ පීඩාවට පත්වූවන්ට යුක්තිය ඉටුකිරීමට, රාජ්‍ය ආයතන කෙරෙහි මහජන විශ්වාසය යළි ඇති කිරීමට සහ අතීතයේ සිදු වූ අසාධාරණයන් අනාගතයේදී නැවත සිදුනොවීමට වගබලා ගැනීමට එයට හැකි වේද යන්නයි.

No comments

Leave A Comment

Comments should not exceed 200 words. Embedding external links and writing in capital letters are discouraged. Commenting is automatically disabled after 5 days and approval may take up to 24 hours. Please read our Comments Policy for further details. Your email address will not be published.

leave a comment