4 April, 2020

Blog

එක්සත් ජාතික පක්ෂය සන්ධානයකින් තරග කරන්නට පැකිලෙන්නේ ඇයි?

සුදර්ශන ගුණවර්ධන

සුදර්ශන ගුණවර්ධන

එක්සත් ජාතික පක්ෂයේ තීරණ ගන්නා සභාව වන කෘත්‍යාධිකාරී මණ්ඩලය විසින් ඉදිරි පාර්ලිමේන්තු ඡන්ද විමසීම සඳහා අලියා ලකුණෙන් තරග කිරීමට තීරණය කළ බව පක්ෂයේ ප්‍රධාන ලේකම් අකිල විරාජ් කාරියවසම් ප්‍රකාශ කළේය. මෙම තීරණය ගනු ලැබූ රැස්වීමට නියෝජ්‍ය නායක සහ ජනාධිපති අපේක්ෂක සජිත් ප්‍රේමදාසට සහය දෙන කණ්ඩායම සහභාගි නොවූ බව වාර්තා වෙයි. මේ අතර සුළුතර කණ්ඩායමේ මාධ්‍ය හමුවකදී පාර්ලිමේන්තු මන්ත්‍රී සුජීව සේනසිංහ ප්‍රකාශ කළෙ තමන් අලියාට කැමැති වුවද හෙණ්ඩුව නැතිව ලැබෙන අලියාගෙන් පළක් නැති බවත්, එබැවින් තම කණ්ඩායම වෙනත් ලකුණකින් සමගි ජන බලවේගය ලෙස පාර්ලිමේන්තු ඡන්ද විමසීමට ඉදිරිපත් වන බවත්ය. සමගි ජන බලවේගය බවට රූපාන්තරණය වී ඇත්තේ ‘අපේ ජාතික පෙරමුණ’ නම් දේශපාලන පක්ෂයයි. එහි ලකුණ වන්නේ දුරකථනයයි.

දැනට ආණ්ඩු බලය හොබවන ශ්‍රී ලංකා පොදුජන පෙරමුණ තරග කරන්නේ සෙසු පක්ෂ සමග සන්ධානයක් ලෙස බව කියැවුණු අතර එහි නම ‘ශ්‍රී ලංකා නිදහස් පොදුජන සන්ධානය’ වෙයි. කෙසේ වුවද එම සන්ධානය ඡන්දයට ඉදිරිපත් වන්නේ එහි ප්‍රධාන පක්ෂය වන ශ්‍රී ලංකා පොදුජන පෙරමුණ වශයෙන් එහි ‘පොහොට්ටුව’ ලකුණෙන් බව ඔවුන් මැතිවරණ කොමිසම වෙත දැනුම් දී ඇත. දෙමළ ජාතික සන්ධානය වශයෙන් ඒකාබද්ධ වී ඇති පක්ෂ එකතුව ඡන්ද විමසීම තරග කරන්නේ එම සන්ධානයේ ප්‍රධාන පක්ෂය වන ඉලංකෛ තමිළරසු කච්චි හි ‘ගෙය’ ලකුණෙනි. ජනතා විමුක්ති පෙරමුණ මුල්වී ගොඩ නගන ලද ජාතික ජන බලවේගය එහි ලකුණ වන ‘මාලිමාව’ මගින් තරගයට එයි.

කෙසේ වුවද රටේ වැඩි කථා බහට ලක්ව ඇත්තේ එක්සත් ජාතික පක්ෂය ප්‍රමුඛ සන්ධානයේ මතුව ඇති නො එකඟතාවය පිළිබඳවය. එයට හේතුව වන්නේ පක්ෂ කෘත්‍යාධිකාරී මණ්ඩලයේ සුළුතර කණ්ඩායම පක්ෂයේ ආධිපත්‍යය ලබා ගැනීම සඳහා ගෙන යන අරගලයයි. මෙය වනාහි ජනාධිපතිවරණයට පෙරාතුව පක්ෂය තුළ කණ්ඩායම් දෙකක් අතර ඇතිවූ අරගලයේම දිගුවකි. වඩා නිවැරදිව කිවහොත් පසුගිය යහපාලන ආණ්ඩු සමය මුළුල්ලෙහි ක්‍රියාත්මක වූ බල කේන්ද්‍ර දෙක අතර ගැටුම ඉදිරියට යාමකි.
එක්සත් ජාතික පක්ෂය සෙසු පක්ෂ මෙන්ම ඡන්ද විමසීම් සඳහා ඉදිරිපත්වූයේ සන්ධානයක් ලෙස වුවත්, ඒ හැම විටම ප්‍රධාන පක්ෂය වශයෙන් ක්‍රියා කළේ එක්සත් ජාතික පක්ෂයයි. එනිසා ජනාධිපතිවරණ හැර සෙසු ඡන්ද විමසීම් තරග කරන ලද්දේ අලියා ලකුණෙන් වන අතර නාම යෝජනා අත්සන් තබන ලද්දේ එක්සත් ජාතික පක්ෂයේ මහ ලේකම්වරයා විසිනි. 2010, 2015 සහ 2019 ජනාධිපතිවරණයන් සඳහා පොදු අපේක්ෂකයා ඉදිරිපත් කරන ලද්දේ නව ප්‍රජාතන්ත්‍රවාදී පෙරමුණෙ හංසයා ලකුණෙනි.

2019 ජනාධිපතිවරණයට පෙර ප්‍රජාතන්ත්‍රවාදී ජාතික පෙරමුණ නමින් එක්සත් ජාතික පක්ෂය ප්‍රමුඛ පුළුල් සන්ධානයක් ගොඩ නැගීමට ගන්නා ලද උත්සාහය පරාජය කරන ලද්දේ සජිත් ප්‍රේමදාස කණ්ඩායම විසිනි. ඔවුන්ගේ තර්කය වූයේ පළමුව ජනාධිපති අපේක්ෂකයා පිළිබඳව පක්ෂය විසින් තීරණය කොට ඉන් පසු අපේක්ෂකයා ගේ නායකත්වයෙන් සන්ධානය ගොඩනැගිය හැකි බවය. මෙහි සැඟවුණු අපේක්ෂාව වූයේ එවකට ජනාධිපති මෛත්‍රීපාල සිරිසේන ප්‍රමුඛ ශ්‍රී ලංකා නිදහස් පක්ෂයේ සහයෝගය දිනා ගැනීමයි. රනිල් වික්‍රමසිංහ නායකත්වය නොදරන හෙවත් සජිත් ප්‍රේමදාස නායකත්වය දරන සන්ධානයකට මෛත්‍රීපාල සිරිසේන එකඟ වනු ඇතැයි යන විශ්වාසය එයට හේතු විය. එනිසා සිහිනෙන් වත් ජනාධිපති සිරිසේනගේ සිත නොරිදෙන පරිදි කටයුතු කිරීමේ ප්‍රතිපත්තියක් සජිත් ප්‍රේමදාස පාර්ශ්වය විසින් ගෙන යන ලද්දේය. පක්ෂයෙන් ජනධිපති අපේක්ෂකත්වය ලබා ගත් සජිත් ප්‍රේමදාස ගේ මෙහෙයුම් කාර්යාලයෙහි ප්‍රධාන භූමිකාවන් ජනාධිපති ලේකම් කාර්යාලය සමග ‘වයරින්’ වී තිබූ පිරිස් අතට ගියේ ඒ ආකාරයටය. කෙසේ වුවද අවසානයේ සිදු වූයේ මෛත්‍රීපාල සිරිසේන ස්වාධීන වී ඔහුගේ ශ්‍රී ලංකා නිදහස් පක්ෂය ‘පොහොට්ටුව සරණං ගච්ඡාමි වීම’ ය.

ජනාධිපතිවරණ පරාජයෙන් පසුව පාර්ලිමේන්තුවේ විපක්ෂ නායක ධුරයට පත්වීමට සජිත් ප්‍රේමදාසට හැකි විය. එහෙත් ගත වූ මාස පහකට ආසන්න කාලය තුළ එක්සත් ජාතික පක්ෂයෙහි නායකත්වය වෙනස් කොට එහි බලය ලබා ගැනීමට ඔහු ප්‍රමුඛ කණ්ඩායම අපොහොසත් විය. කෙසේ වුවද පාර්ලිමේන්තු ඡන්ද විමසීම මෙහෙයවීම, අගමති අපේක්ෂකත්වය, යෝජිත සන්ධානයේ නායකත්වය සහ නාම යෝජනා මණ්ඩලයේ සභාපතිත්වය සජිත් ප්‍රේමදාසට පැවරීමට එක්සත් ජාතික පක්ෂයේ කෘත්‍යාධිකාරී මණ්ඩලය තීරණය කළේය. ඒ අනුව ඔහුගේ ප්‍රියතම අක්ෂරය වන ‘ස’ යන්නෙන් පටන් ගන්නා ‘සමගි ජන බලවේගය’ නම් සන්ධානය පිහිටුවීමට සජිත් ප්‍රේමදාස නායකත්වය දුන්නේය. දීර්ඝ කාලයක් තමාට පක්ෂපාතීව සිටි රංජිත් මද්දුම බණ්ඩාර එහි ලේකම්වරයා ලෙස පත් කර ගන්නා ලද්දේය. .

එක්සත් ජාතික පක්ෂ කෘත්‍යාධිකාරී කමිටුවේ තීරණයට එරෙහි වන්නන් ප්‍රශ්න කරන්නේ සන්ධානයක් ලෙස කටයුතු කරන්නට එකඟ නම් ‘සමගි ජන බලවේගයේ’ පොදු ලකුණ යටතේ තරග කිරීමට එය විරුද්ධ වන්නේ මන්ද යන්නයි. නිදසුනක් ලෙස 1994 දී ශ්‍රී ලංකා නිදහස් පක්ෂය මුල්වී ගොඩ නැගූ පොදුජන එක්සත් පෙරමුණ සහ 2004 දී ගොඩ නැගූ එක්සත් ජනතා නිදහ්ස් සන්ධානය ඔවුහු ඉදිරිපත් කරති. මෙම සන්ධාන දෙකම ගොඩ නගන ලද්දේ එවකට සැලකිය යුතු දේශපාලන බලවේග දෙකක් ලෙස පැවැති එක්සත් සමාජවාදී පෙරමුණ (1994) සහ ජනතා විමුක්ති පෙරමුණ (2004) ශ්‍රී ලංකා නිදහස් පක්ෂය සමග සන්ධානගත කිරීම උදෙසාය. එම සන්ධාන දෙකෙහිම තීරක බලය හෙවත් නායකත්වය ශ්‍රී ලංකා නිදහස් පක්ෂය සතුවය. සන්ධාන දෙකෙහි ලේකම් ධුරයට නායකත්වය විසින් පත් කරන ලද්දේ පිළිවෙළින් දි. මු. ජයරත්න සහ සුසිල් ප්‍රේමජයන්ත් යන ශ්‍රී ලංකා නිදහස් පාක්ෂිකයන්ය.

මෙම නිදසුන්වලට සාපේක්ෂව සමගි ජන බලවේගය විසින් එක්සත් ජාතික පක්ෂය වෙත එකතු කරන නව දේශපාලන බලවේගයක් නැත. මෙම බලවේගයට දැනට සම්බන්ධ වී ඇත්තේ එක්සත් ජාතික පක්ෂය සමග එක්ව 2015 පාර්ලිමේන්තු ඡන්ද විමසීමට මෙන්ම 2018 පළාත් පාලන ඡන්ද විමසීමට අලියා ලකුණෙන් ඉදිරිපත් වූ දේශපාලන පක්ෂ වේ. ඒ නිසා නව සන්ධානයට අලියා ලකුණෙන් ඉදිරිපත් වීමෙන් ඒ කිසිවෙකුගේ පතිවතට හානියක් නොවේ. මෛත්‍රීපාල සිරිසේන ප්‍රමුඛ ශ්‍රී ල නි ප ය මේ සඳහා ඈන්දා ගැනීමට කිසියම් බලාපොරොත්තුවක් තිබිණි නම් එයද දැන් අවසන් ය.

එසේ නම් සිදුව ඇත්තේ රනිල් වික්‍රමසිංහ වෙතින් නායකත්වය ලබා ගැනීමට අසමත් වූ සුළුතර කණ්ඩායම ‘සමගි ජන බලවේගය’ නමින් අලුත් දේශපාලන පක්ෂයක් ගොඩ නගා ගැනීමයි. එය එක්තරා ආකාරයකට ජනතා විමුක්ති පෙරමුණේ පාලනය සහ බලය යටතෙහි පවතින ජාතික ජන බලවේගය මෙන් වූ වෙනම දේශපාලන පක්ෂයකි. කලින් එක්සත් ජාතික පක්ෂය සමග සන්ධානගතව සිටි දෙමළ පක්ෂ තුනත්, මුස්ලිම් පක්ෂ දෙකත්, ජාතික හෙළ උරුමයත් මාර්තු 2 දා ‘නෙළුම් පොකුණ මහින්ද රාජපක්ෂ රඟහලේදී සන්ධානගතව ඇත්තේ එම නව දේශපාලන පක්ෂය සමග ය.

එක්සත් ජාතික පක්ෂය කියන්නේ තමන්ට සන්ධානයක් මගින් ඡන්දයට ඉදිරිපත් වීමේ ගැටලුවක් නැතත්, වෙනත් පක්ෂයකින් ඡන්දයට ඉදිරිපත් විය නොහැකි බවය. පක්ෂ කෘත්‍යාධිකාරී මණ්ඩලයේ තීරණයකින් තොරව යමෙකු එසේ කළ හොත් පක්ෂ සාමාජිකත්වය අහෝසි වීමට එය හේතුවක් වේ. එබැවින් කෘත්‍යාධිකාරී මණ්ඩලය තීරණය කර ඇත්තේ එක්සත් ජාතික පක්ෂ්ය ලෙස ඡන්දයට ඉදිරිපත් වීමටය. එහිදී සමගිය රැකගැනීම සඳහා ගනු ලබන පියවරක් ලෙස සමගි ජන බලවේගය සමග අවබෝධතා ගිවිසුමක් අත්සන් කිරීමටද තීරණය කොට ඇත. එමගින් නාම යෝජනා ආදිය සම්බන්ධව එකඟ්තාවයක් සාදා ගැනීමට බලාපොරොත්තු වේ. ඡන්දය මෙහෙයවීම සජිත් ප්‍රේමදාස ප්‍රමුඛ සමගි ජන බලවේගයට පැවරෙනු ඇති අතර ඔහු අගමැති අපේක්ෂකයාද වනු ඇත.

මේ තීරණයට එකඟ නොවුණහොත් ‘සමගි ජන බලවේගය’ පක්ෂය වෙනමත්, එක්සත් ජාතික පක්ෂය වෙනමත් ඡන්ද විමසීම සඳහා ඉදිරිපත් වනු ඇත. එවිට ජන ප්‍රසදය ඇත්තේ කාටද යන්නත්, අනාගත අභියෝග ජය ගැනීම සඳහා වන උපාය මාර්ගික එළැඹුම ඇත්තේ කාටද යන්නත් උරගා බැලෙනු ඇත. සියල්ල තව සති දෙකක් ඇතුළත තීරණය වනු ඇත.

Print Friendly, PDF & Email

No comments

Sorry, the comment form is closed at this time.

Leave A Comment

Comments should not exceed 300 words. Embedding external links and writing in capital letters are discouraged. Commenting is automatically shut off on articles after 10 days and approval may take up to 24 hours. Please read our Comments Policy for further details. Your email address will not be published.