15 July, 2020

Blog

රාජ්‍ය විරෝධීන්ට වසර විස්සක සිර දඩුවම්

තුෂාර වන්නිආරච්චි –

තුෂාර වන්නිආරච්චි

ලංකාවේ දේශපාලනය තුළ මේ සතිය උණුසුම් වූයේ ජනාධිපතිවරයා විසින් හදිසියේම තවත් අගමැතිවරයෙක් පත්කිරීම නිසාය. විශේෂයෙන් එක්සත් ජාතික පක්ෂයේ මන්ත්‍රීවරු මෙන්ම පාක්ෂිකයෝ ජනාධිපතිවරයා කෙරෙහි තදින් උරණව සිටී. ජනාධිපතිවරයාගේ මෙම හැසිරීම ජාත්‍යන්තරය විසින් ප්‍රථමයෙන් විශ්වාස නොකළ අතර ඔවුන් ජනාධිපතිවරයාගේ මානසික සෞඛ්‍ය ප්‍රශ්න කර සිටි බවටද තොරතුරු පළවේ. ඔහු විසින් සිදුකරන ලද ක්‍රියාව ලංකාවේ මිලියන 23 ක් වන ජනතාවගේ ජීවිත බරපතල අවදානමකට දමා තිබේ. රටේ ආර්ථිකය දේශපාලනය හා පැවැත්ම සම්පූර්ණයෙන්ම පාහේ මේ මොහොතේ ඇත්තේ බරපතල අවදානමකය. අගමැතිවරයාගේ ඉවසීමත් වෘත්තීය භාවයත් නිසාවෙන් ලංකාව ලේ විලක් බවට පත් නොවී තිබේ. කෙසේ වෙතත් එක්සත් ජාතික පක්ෂයේ බලය අත නොහැරීමේ දැඩි තීන්දුවක ඉන්න බව පෙනෙන්නට තිබේ. එම පක්ෂය ඉතිහාසයේ කෙදිනකවත් නොවූ අයුරින් සටන්කාමී මාවතකට එලැඹෙමින් තිබේ. ඒ පිළිබද මේ රටේ සිවිල් ජනතාවගේ දේශපාලන ක්‍රියාධරයන් ගේ මෙන්ම ජනතාවගේ ආශිර්වාදය හිමිවෙමින් තිබේ. රටේ මෙන්ම ප්‍රජාතාන්ත්‍රික අයිතිවාසිකම් මේ මොහොතේ මුහුණ දී තිබෙන තත්ත්වයෙන් රට මුදවා ගැනීමේ වගකීම ඇත්තේ එක්සත් ජාතික පක්ෂයටයි.

රාජපක්ෂවරු මෙහිදී මෙම ක්‍රියාවලියට සම්බන්ධ​ වන්නේ ඔවුනට එරෙහිව ඇති අධිකරණ ක්‍රියාවලියන්ගේ තීරණාත්මක අවසානයකට ලගා වෙමින් පවතින වට පිටාවක් තුළය. නැතිනම් ආණ්ඩුක්‍රමය පිළිබද රාජපක්ෂවරුන්ගේ අවබෝධය ජනාධිපතිවරයාට වඩා බොහෝ ඉහළය. නමුත් හිරේ විලංගුවේ නොවැටී සිටීමට බලය අත්පත් කර ගැනීම ඔවුන්ගේ පැත්තෙන් අනිවාර්ය කොන්දේසියකි. ඒ වෙනුවෙන් රටේ ජනතාව ඕනෑම මිලක් ගෙවීම ඔවුන්ට අදාළ නොවේ.

අනිත් අතින් ජනාධිපතිතුමන්ව රාජ්‍ය තාන්ත්‍රිකයකුගේ සිට විහිළුකාරයෙකු බවට මෙම ශ්‍රී ලංකා නිදහස් පක්ෂයේ ඇමැතිවරුන් හා ඔහුගේ උපදේශකයින් පත් කොට තිබේ. එතුමාගේ දේශපාලන ක්‍රියාකාරීත්වය අපිරිසිදු, අණක් ගුණක් නැති, කිසිවෙකුටත් පාලනයක් නැති තත්ත්වයකට පත්කොට තිබේ. එමෙන්ම එතුමා ඉතාම භයානක පුද්ගලයෙකු බවට පත් වී තිබේ. ලෝකයේ අන්ත එකාධිපතියන් බවට පත්ව ඇත්තේ දුර්වල හා සංකූලතා සහිත පුද්ගලයින් බව ලෝක ඉතිහාසය පෙන්වා දී තිබේ.

මෙම සටන රාජපක්ෂවරු හෝ ජනාධිපති සමග සටනක් නොව රටේ අනාගතය පිළිබද සටනකි. යක්ෂයා සමග සටනකි. මෙම සටන එක්සත් ජාතික පක්ෂය ජයගත යුත්තේ බලය නිසා නොව ඒකාධිපතිත්වයෙන් රට ආරක්ෂා කිරිමේ දේශපාලන වගකීම ඇත්තේ පක්ෂයට බැවිනි. මේ රටේ ජනතාවගේ අයිතිවාසිකම් ආරක්ෂා කිරීම එක්සත් ජාතික පක්ෂයේ පරම වගකීමකි. එය මගහැරීමට පක්ෂයට හැකියාවක් නොමැති අතර මේ රටේ ජනතාවගේ අරක්ෂාව පක්ෂය මත පැටවී තිබේ.

අනිත් අතින් මෙම ජනාධිපතිගේ ක්‍රියාකාරීත්වය රාජ්‍ය විරෝධී කුමන්ත්‍රණයකි. එයට සම්බන්ධ වන ඕනෑම කෙනෙකුට වසර විස්සක සිර දඩුවම් ලබා දිය හැකිය. එනම් එයට පක්ෂව මත පල කරන්නට වුවද එම දඩුවම ලබා දිය හැකිය. නීත්‍යානුකූලව මැතිවරණයකින් ජනවරමක් ලබා බලයට පත්වූ ආණ්ඩුවක් විධිමත් ආණ්ඩුක්‍රම ව්‍යවස්ථාවට අදාළ ක්‍රියාවලියකින් තොරව ජනමතයක් රහිතව පලයෙන් පහ කිරීමට උත්සහ කරන්නේ නම් එය රාජ්‍ය විරෝධී කුමන්ත්‍රණයකි. ජනාධිපතිවරයා දැනුවත්ව හෝ නොදැනුවත්ව රාජ්‍ය විරෝධී ක්‍රියාවලියක යෙදී තිබේ. රාජපක්ෂවරු කෙලින්ම එයට සම්බන්ධ වී තිබේ. එසේම එයට පක්ෂව මත පළ කරන්නන් සහයෝගය දක්වන්නන්, සියලුම දෙනා වසර විස්සක සිර දඩුවම් ලැබීමට හැකි වරදක් සිදුකරන්නෝ වෙති. වසර විස්සක් යනු ඉතා දිගු කාලයකි. දේශපාලන ක්‍රියාදරයෙනි ප්‍රවේශම් වන්න.

මෙම අර්බුදය​ රටේ එදිනෙදා ජන ජීවිතය ඉදිරි සතිය තුළ මුලුමනින්ම බිද දමන්නක් බවට පත්වේ. මන්ද යත් ආණ්ඩුවේ එදිනෙදා කටයුතු කිරීමේදී නිලධාරීන් විචිකිච්ඡාවට පත් වීම මත රජයේ කටයුතු කඩාකප්පල් වනු ඇත. එසේම ජාත්‍යන්තර සම්බාධක පැනවීම පිළිබද යුරෝපා සංගමයත්, එක්සත් ජාතීන්ගේ සංවිධානයත් සලකා බලමින් තිබෙන බව තානාපති ආරංචි මාර්ග ප්‍රකාශ කරයි. දීර්ඝ කාලයක් ප්‍රජාතන්ත්‍රවාදී වටපිටාවක කටයුතු කළ රටක්  එම පීල්ලෙන් මිදී කටයුතු කිරීම ශීලාචාර ජාතීන් ඉවසන්නක් නොවේ. විශේෂයෙන් ඉන්දියානු සාගරයේ ශ්‍රී ලංකාවේ පිහිටීමේ වැදගත්කම හා චීනය ලංකාව සම්බන්ධයෙන් කටයුතු කරන ආකාරය සීලාචාර යුරෝපා ජාතීන්ගේ සැකයට හේතු වී තිබේ. එම නිසා ඉදිරි සති දෙක තුල තුළ මෙම අර්බුධය විසදීමට ශ්‍රී ලංකාවේ දේශපාලන පක්ෂ හා නායකයින් අපොහොසත් වුවහොත් ජාත්‍යන්තර සම්බාධක පැනවීමට ඇති ඉඩකඩ වැඩි වේ. 

මෙය විසදිය හැකි ක්‍රමවේදය වන්නේ අගමැතිවරයා ප්‍රකාශ කරන පරිදි හැකි ඉක්මනින් පාර්ලිමේන්තුව කැදවා බහුතරය ඇත්තේ කාටදැයි පෙන්වා ආණ්ඩුව පවත්වාගෙන යාමයි. ඒ සදහා ප්‍රජාතන්ත්‍ර විරෝධී ක්‍රමවලින් පාර්ලිමේන්තුව කල්දමා මෙය කුමන්ත්‍රණයක් ලෙස පවත්වාගෙන යාම මේ රටේ අනාගතය අවධානමට දැමීමට කිසිවෙකුටත් අයිතියක් නොමැති අතර ඒ සදහා ක්‍රියාත්මක වෙන හා කුමන්ත්‍රණය කරන ඕනෑම කෙනෙකු වසර විස්සක් සිර දඩුවම් ලබාදිය හැකි වරදක් බව ආණ්ඩුව විසින් ප්‍රකාශ කළ යුතුය. 

අවසාන වශයෙන් කිවයුත්තේ මේ මොහොතේ එක්සත් ජාතික පක්ෂය මත පැවරී ඇති වගකීම වන්නේ බලය රැකගැනීම නොව, මේ රටේ විශාලම ප්‍රජාතන්ත්‍රවාදී දේශපාලන බලවේගය ලෙස ජනතාවගේ ප්‍රජාතන්ත්‍රවාදී අයිතිවාසිකම ආරක්ෂා කිරීමත්, ඒකාධිපතිවාදයට ගමන්කරමින් තිබෙන මෙම ක්‍රියාවලිය අවසන් කොට රටේ ජනතාවගේ අයිතිවාසිකම් හා ස්වාධීපත්‍ය ආරක්ෂා කොට ඔවුන්ට නිදහස් නිවහල් රටක ජන ජීවිතය පවත්වාගෙන යාමට ඇති අවස්ථාව සලසා දීමය. එය එක්සත් ජාතික පක්ෂයට මගහැරිය නොහැකි වගකීමකි.

Print Friendly, PDF & Email

No comments

Sorry, the comment form is closed at this time.

Leave A Comment

Comments should not exceed 200 words. Embedding external links and writing in capital letters are discouraged. Commenting is automatically disabled after 7 days and approval may take up to 24 hours. Please read our Comments Policy for further details. Your email address will not be published.