ලිහිනි ප්‍රනාන්දු –

නීතීඥ ලිහිනි ප්‍රනාන්දු

බුදුරජාණන් වහන්සේ තුන් වරක් වැඩිය දේශයක,
සෑම පෝයටම සිල් සමාදන් වන මිනිස්සු සිටිනා දේශයක, ආගමික නායකයන්ගෙන් නොකඩවා අවවාද ධර්මානුශාසනා ලබනා දේශපාලනඥයින් සිටිනා දේශයකට මෙසේ විය හැකිද?

ධර්මය.. ධර්මය වනාහි හුදු චාරිත්‍ර හා වතාවත් වලින් ඔබ්බට දිවෙන්නකි.
එය ජීවන මාර්ගයකි.
ඔබ ධර්මයෙහි හැසිරෙනවාද?

පන්සල් පල්ලි නොකඩවා ගියත්,
හිත තුල ඇත්තේ වෛරය, ද්වේෂය නම්,
අනෙකාගේ දේ කඩා වඩාගෙන ගොස් මුදුනට යෑම ඉලක්කය නම්,
හොරකම, පරම්පරා ගණනාවකට රැස්කිරීම ඔබේ හුදු අභිප්‍රාය නම්,
රාජ්‍ය දේපල අවභාවිතා කිරිම පරම පිවිතුරු අරමුණ නම්,
“උන්ට හොඳ නම්, අපි කරාම මොකද” යැයි එය සාධාරනීකරණය කරනවා නම්,
තම වාසියට රටේ නීතිය හදන්න, වනසන්න, නවන්න පුළුවන් නම්..

මෙවන් නායකයන් / පාලකයින් සිටිනා දේශයකට කිනම් සෞභාග්‍යයක්ද?

ඔබ බලයට පැමිණි දා සිට හිතන්නේ “කෙසේ මගේ මඩිය තරකරගන්නද” කියා නම්,
ඔබ ඔබේ හෙන්චයියන්ට උගන්වන්නේ “කෙසේ හෝ ‘අපි’ ගොඩ යමු” කියා නම්,
ඔබ සිතනුයේ “මගෙන් පසු මගේ පුතා හෝ දියණිය මගේ තැන ගනු ඇත” කියා නම්,

ඔබේ මේ “අපේ”, “මගේ” ගොඩට “රටේ” ජනයා අයිති වෙන්නේ නැත.
ඔබේ කුස පෙරට එද්දි පස්සට යන ඔවුන්ගේ කුස පෙනෙන්නේ නැත.
ඔවුන්ගේ ලේ, දහඩිය, කඳුළු වල සුවඳ සීත කරපු කාමර ඇතුලට,
වාහනයේ කළු කරපු කන්නාඩියෙන් ඔබ්බට,
හමන්නේද නැත.

සාධාරණය, යුක්තිය, අවංකභාවය ඔබට අදාල‍ම නැත.
ඔබට අයිති නැති යාන වාහන, මිල මුදල්, දේපල රැස් කිරිම ඔබේ ඉලක්කය වී ඇත.

මම අද මෙසේ කියමි :

නුඹලා ඔක්කොම හොරු
නුඹලා ඔක්කොම ඩීල්කාරයෝ
නුඹලාට ජනතාව ගැන කිසිදු තැකීමක් නැහැ
අපේ ළමයින් අපයෝජනයට ලක් වුවත්
අපේ කාන්තාවන් ලිංගික අපරාධයන්ට​ ලක් වුවත්
අපේ මිනිසුන් බඩගින්නේ මැරුනත්
අපේ රටේ ආර්ථිකය කඩා වැටුනත්
අපේ රටේ පරිසරය විනාශ වුවත්
ඔබට ගානක් නැත..
ඔබට අවශ්‍ය වන්නේ හොදින් හෝ නරකින් ඔය පුටුවේ, ඔය බලයේ වැජඹීම පමණයි.
ඔබ හොයන්නේ වඩා හොඳ පුටු පමණයි.

මේ දේශයේ සාපය වන්නේ බලයෙන් උන්මත්තක වු, බලය ලබාගැනීමට තම ආත්මය පවා පවාදෙන දුෂිත, අවස්ථාවාදි “දේශපාලුවා” වන ඔබ මිස වෙන කවරෙකුවත් නොවේ.

ඔබත් මේ කුලකයේ දේශපාලඥයෙක් නම්,

මේ ගෙවෙන්නේ ඔබගේ අවසාන කාලයයි.
ස්වභාව ධර්මයා විසින් ඔබ සියලු දෙනා නිරයට හෙලන බව සිහි කරන්න..
මැරෙන දවසට අප මෙන්ම ඔබත් යන්නේ හිස් අතින් බවත් අමතක නොකරන්න.

දැන්වත් ඔය වෙස් මුහුණු ගලවන්න!
ඇස් අරින්න.

නුඹලා ඔක්කොම ෆේල් !