28 March, 2024

Blog

රජයේ වෛද්‍ය නිලධාරීන්ගේ සංගමයේ ඉන්දීය-විරෝධී ‘මැලේරියා’ විදේශික-භීතිකාව අජූවයි

රංග ජයසූරිය

රංග ජයසූරිය

රංග ජයසූරිය

රජයේ වෛද්‍ය නිලධාරීන්ගේ සංගමයේ ප‍්‍රකාශකවරයා සිංහල කැලැන්ඩරයේ අවසාන දිනය නිමා කෙළේ අප‍්‍රසන්න ආකාරයකිනි. ශ‍්‍රී ලංකාවේ සිටින ඉන්දියානු ජාතික සේවකයෙකු මැලේරියා රෝගයට ගොදුරු වී සිටීමේ සිද්ධියක්, රජයේ වෛද්‍ය නිලධාරීන්ගේ සංගමයේ ලේකම් වෛද්‍ය නලින්ද හේරත් ඉතා පහත් ප‍්‍රචාරක වාසියක් සඳහා එදා යොදා ගනු පෙනුණි. පරණ අවුරුද්දට කලින් දා ප‍්‍රකාශයක් නිකුත් කළ මොහු, ‘ඉන්දියන්කාරයන් අසළක සිටින්නේ නම් පරිස්සම් වන්නැ’ යි ලාංකිකයන්ගෙන් ඉල්ලා සිටියේය. ලංකාවේ වෛද්‍යවරුන් කිහිප දෙනෙකු වකුගඩු ජාවාරමක කොටස්කරුවන් වී ඇති බවට චෝදනා නැගෙන වර්තමාන තත්වය තුළ, ලාංකීය වෛද්‍යවරුන්ගෙන් ප‍්‍රවේශම් වන්නැයි ඉන්දියානු වෛද්‍යවරුන් ඉන්දියානුවන්ගෙන් ඉල්ලා සිටීමට තීරණය කෙළේ නම් එය මොන තරම් අමනෝඥ වන්නේද, දොස්තර නලින්ද හේරත්ගේ ප‍්‍රකාශයත් එවැනිම අමනෝඥ කතාවකි. (වකුගඩු ජාවාරමට බිළි වූ වින්දිතයන් වෙනුවෙන් පෙනී සිටි නීතිඥවරයෙකු කොළඹ ප‍්‍රධාන මහේස්ත‍්‍රාත්වරයා ඉදිරියේ කළ කරුණු දැක්වීමකට අනුව, 1200 කට වැඩි ඉන්දියානුවන් සංඛ්‍යාවකගේ වකුගඩු ශ‍්‍රී ලංකාවේදී ඉවත් කොට තිබේ).

දොස්තර නලින්ද හේරත් වපුරන භීතිකා ව්‍යාපාරය සංඛ්‍යාත්මකවත් පුස්සකි. ඔහු මේ කියන්නේ, ගිය වසරේ ලංකාවට පැමිණි 300,000 ක් ඉන්දියානු සංචාරකයන් සහ තවත් දහස් ගණනක් වන ලංකාවේ සේවය කරන ඉන්දියානුවනුත් අතරින් එක පුද්ගලයෙකු ගැන පමණි. මාර්ග අනතුරකින් කෙනෙකු මියයාමට හෝ හදිසි හෘදයාබාදයක් වැළඳුණු රෝගියෙකු ත‍්‍රීරෝද රථයක රෝහලට රැුගෙන යාමේදී මියයාමට, මීට වඩා වැඩි ඉඩක් තිබේ. එසේ තිබියදීත්, අපේ රෝගීන්ව රෝහලට රැුගෙන යාමේ ගිලන් රථ සේවයක් ඇති කිරීමේ ව්‍යාපෘතියකට රජයේ වෛද්‍ය නිලධාරීන්ගේ සංගමය තදබල විරෝධය පෑවේය. හේතුව, ඊට ඉන්දියානු සම්බන්ධයක් ඇති බැවිනි.

මේ වෛද්‍යවරයාගේ ප‍්‍රකාශය හුදෙක් තකතිරු විකාරයක් පමණක් නොව, එය ජාතිවාදී, විදේශික-විරෝධී සහ අදානග‍්‍රාහී ප‍්‍රකාශයක්ද වන්නේය. ඒ සියල්ල, ජාතියක් වශයෙන් අප වැළකී සිටීමට උත්සාහ ගන්නා අගතීන් ය. මෙවන් වෘත්තීයවේදීන්ගේ කීර්තිමත් සංවිධානයක් මෙතරම් පහත් අඩියකට මින් පෙර කිසි දවසක වැටී නැත. ඊට එකම හේතුව වශයෙන් පෙනී යන්නේ, මෙවැනි සංවිධානවල නායකත්වය අද වන විට මුග්ධයන් අතට පත්ව තිබීමයි. එසේ වන්නේ, සමහර විට, එම ක්ෂේත‍්‍රයේ නියුක්ත වඩාත් සිහි බුද්ධිය ඇති පිරිස්, වෘත්තීය සමිති කටයුතුවලට අතගැසීමට උනන්දු නොවීම විය හැකිය. කෙසේ වෙතත්, එය කණගාටුවට කරුණකි. මන්ද යත්, මෙවැනි සංවිධානවලින් ජාතික කතිකාවන්ට සහ ප‍්‍රතිපත්තිවලට දායකත්වයක් සැපයිය යුතු බැවිනි.

මෙවැනි විදේශික-විරෝධී කුණු කන්දල් භීතිකා වැපිරීම සිවිල් සමාජයේ අභියෝගයට ලක් නොවීමත් කණගාටුවට කාරණයකි. සමහර විට සිවිල් සමාජය මේ දිනවල අවුරුදු කමින් සිටිනවා විය හැකිය. තමන්ගේ සැණකෙලි අසිරිය සහ කන බොන විනෝදය මෙවැනි මෝඩ ප‍්‍රකාශයන්ට පිළිතුරු දීම සඳහා කැප කිරීමේ අරුතක් නැතැයි ඔවුන් සිතනවා ඇති. එහෙත්, ශ‍්‍රී ලංකාව සිහි නුවණින් යුත් රටක් සේ දිගටම පැවතීමට නම්, මෙවැනි ඔල්මාද වැපිරෙන්නේ අද සිටින දොස්තරලාගෙන් වුවත්, ඊට නිසි ප‍්‍රතිචාර නොවලහා දැක්විය යුතුව තිබේ.

උගත් ප‍්‍රභූන් පිරිසක් වශයෙන් ගැනෙන වෛද්‍යවරුන්ගේ කටින් පිටවන ඕනෑම දෙයක් සුභාෂිතයක් සේ ගැනීමට ගැමියන් පෙළඹිය හැකිය. ඒ අනුව, රජයේ වෛද්‍ය නිලධාරීන්ගේ සංගමයේ ලේකම්වරයා කරන ප‍්‍රකාශය ඔවුන් භාර ගැනීමට ඉඩ තිබේ. සාමාන්‍ය ජනතාවගේ අහිංසක කම (මෝහය) බොහෝ විට ප‍්‍රභූන් විසින් තමන්ගේ ආත්මලාභී අභිලාෂයන් සඳහා ප‍්‍රයෝජනයට ගනී. රජයේ වෛද්‍ය නිලධාරීන්ගේ සංගමයේ ලේකම්වරයා දැන් කරන්නේ හරියටම එයයි. එය අජූව දනවන හැසිරීමකි. ශ‍්‍රී ලාංකිකයන් තමන් උපමා කොට ගත යුතුය. යම් බලයක් උසුලන විදේශිකයෙකු අප ගැන මෙවැනි සාහසික සාමාන්‍යකරණයක් කෙළේ නම් එය අපට දැනෙනු ඇත්තේ කෙසේද? රාජපක්ෂගේ බෙලිඅත්තේ හෙංචයියෙක් වරක් විදේශික කාන්තාවක් දූෂණය කොට ඇගේ පෙම්වතා වූ බි‍්‍රතාන්‍ය ජාතිකයෙකු ඝාතනය කර තිබීම නිසා, ශ‍්‍රී ලංකාවට පැමිණෙන බි‍්‍රතාන්‍ය කාන්තාවන් ශ‍්‍රී ‘ලාංකීය පිරිමින්ගෙන් පරිස්සම් වී සිටින්න’ යැයි බි‍්‍රතාන්‍ය පොලීසිය නිවේදනයක් නිකුත් කළොත් තත්වය කවරේද? වෛද්‍ය නිලධාරීන්ගේ සංගමයේ ප‍්‍රකාශකයාගේ තර්කය අනුව, ඉහත කී සිද්ධිය මත පදනම්ව, අප සියල්ලන්ම මිනීමරුවන් සහ ස්ත‍්‍රී දූෂකයන් වීමට එවිට ඉඩ තිබේ.

වෛද්‍ය නිලධාරීන්ගේ සංගමයේ ක‍්‍රියා කලාපය ඉතා බාල එකකි. එහි අරමුණත් බාල ය. යෝජිත ශ‍්‍රී ලංකා-ඉන්දීය එට්කා ගිවිසුම පිළිබඳ මේ සංගමයේ දැඩි විරෝධයක් තිබේ. ඉන්දියානු වෘත්තීයවේදීන් මෙරටට පැමිණියොත් තමන්ගේ රැුකියාවන්ට ප‍්‍රශ්නයක් ඇති වෙතැයි ඔවුහු බිය වෙති. ඇත්ත වශයෙන්ම එට්කා ගිවිසුම එවැන්නක් නොවේ. අනික, විශාල ආර්ථිකයන් සහිත රටවල් සමග ගිවිසුම්ගත වීමෙන් කුඩා රටවල්වලට සාපේක්ෂ මෙන්ම නිරපේක්ෂ වාසිද අත්වන බව බොහෝ අධ්‍යයනයන් මගින් මේ වන විට ඔප්පු කොට තිබේ.

රජයේ වෛද්‍ය නිලධාරීන්ගේ සංගමය මේ ගිවිසුමට විරුද්ධ වන්නේ, තමන්ගේ ලාභාපේක්ෂා සහ පෞද්ගලික ධනෝපායනය ගැන සිතීමෙන් මිස වෙන දෙයක් නිසා නොවේ. ඉන්දියාව යනු ලෝක දෙකකි. ඉන්දියාවේ සමස්ත සෞඛ්‍ය දර්ශක එතරම් සතුටුදායක නැති බව ඇත්ත. එහෙත්, ධනවත් මධ්‍යම පංතිය වෙනුවෙන් උසස් වෛද්‍ය සේවා සපයන දියුණු සෞඛ්‍ය අංශයක් ඉන්දියාවේ තිබේ. ඒ නිසා, බටහිර සහ මැද පෙරදිග සිට සෞඛ්‍ය සේවා ලබා ගැනීම සඳහාම සංචාරකයෝ ඉන්දියාවට එති. අපේ වෛද්‍ය නිලධාරීන්ගේ සංගමය කියන පරිදි ඉන්දියානු වෛද්‍ය සේවාව ඔය තරම් පහත් නම්, මැද පෙරදිග රටවල ධනපති ෂීක්වරුන්, චෙන්නායි, බැංගලෝර් සහ මුම්බායි වැනි ඉන්දියානු නගරවල සෞඛ්‍ය සේවාවන් සොයා පැමිණීම ගැන දෙවරක් සිතා බලනු ඇත.

නැත, අපේ වෛද්‍යවරුන් මේ දඟලන්නේ තමන්ගේ සාක්කුව ගැන ය. දැනට තමන්ට ඇති ඒකාධිකාරී වරප‍්‍රසාදයක් අහිමි කර ගැනීමට ඇති බිය විසින් ඔවුන්ව මෙහෙයවනු ලබයි. එසේ නොමැතිව, ඔවුන් කියන පරිදි, සෞඛ්‍ය සේවයේ තිබිය යුතු යැයි ඔවුන් සළකන ගුණයක් ගැනවත්, නිදහස් සෞඛ්‍ය සේවාවක් ගැනවත්, වෙනත් මොනයම්ම හෝ උත්තුංග අරමුණක් ගැනවත් තැකීමක් ඔවුන්ට නැත. ඇත්ත වශයෙන්ම, යම් සේවාවක ගුණාත්මක භාවය වැඩෙන්නේම, තරගය සහ විවෘත භාවය තිබෙන තරමටයි.

ශ‍්‍රී ලාංකිකයන් වන අපට ප‍්‍රශ්නයක් තිබේ. එක අතකින් එය, ලිං මැඩි ස්වභාවයේ ලක්ෂණයකි. ස්වභාෂා අධ්‍යාපනය ඊට හේතු විය. ඉන්දියාව දෙස බැලීමට අප නැමියාවක් දක්වන්නේ, දසලක්ෂ ගණන් දුප්පතුන්ගෙන් පිරී ගිය රටක් වශයෙන් මිස, දහස් ගණන් තොරතුරු තාක්ෂණ ඉංජිනේරුවන්, ලෝකයේ මුල් පෙළේ බහු-ජාතික සමාගම් සහ ලෝකය පුරා සැරිසරන ධනපති මධ්‍යම පංතියක් සහිත රටක් වශයෙන් නොවේ. මේ නිසා අපේ බුද්ධිමය දුගී භාවයේ දුර්වලතාවන් තමන්ගේ ස්වාර්ථකාමී පටු අරමුණු වෙනුවෙන් ගසාකෑමට කටහැකර විගඩම්කාරයන්ට ඉඩ ලැබී තිබේ.

ඉන්දීය-විරෝධයේ නව භීතිකාව පෙරටත් වඩා දැන් උත්සන්න වී ඇත. එය භයානක සෙල්ලමක්ද වන්නේය. මේ භීතිකාව, මීට කලකට පෙර, ඉන්දියාවෙන් ආනයනය කළ පරිප්පු තහනම් කරමින් ඉන්දියානු සාම සාධක හමුදාව ලංකාවෙන් පන්නා දැමීමට එදා ජනාධිපති ආර්. පේ‍්‍රමදාසව තල්ලූ කළ දේශපාලනය අපට සිහිගන්වයි. එය, එල්.ටී.ටී.ඊ. සංවිධානය මුලතිව් කැලෑවට කොටු කොට සිටි මොහොතක් බව අපට මතක ය. එසේ කිරීමෙන් අප කර ගත්තේ, තවත් දශක දෙකක් තිස්සේ එම යුද්ධය අපේ කර පිටට ගැනීමයි. ප‍්‍රතිඵලය වුණේ, තව දහස් ගණන් අහිංසක සිවිල් ජීවිත සංඛ්‍යාවක් විනාශ වීමත්, ආරක්ෂක හමුදා සාමාජිකයන් 25,000 ක් අහිමි කර ගැනීමත් ය.

එබැවින් තවත් වටයකින් විදේශික-විරෝධී භීතිකාවකට හිස එසැවීමට අප ඉඩ තැබිය යුතු නැත.

*2016 අපේ‍්‍රල් 19 වැනි දා ‘ඩේලි මිරර්’ පුවත්පතේ පළවූ “GMOA’s Anti-India ‘Malaria” Xenophobia: Disgusting” නැමැති ලිපියේ සිංහල පරිවර්තනය ‘යහපාලනය ලංකා’ 

Print Friendly, PDF & Email

No comments

Sorry, the comment form is closed at this time.

Leave A Comment

Comments should not exceed 200 words. Embedding external links and writing in capital letters are discouraged. Commenting is automatically disabled after 5 days and approval may take up to 24 hours. Please read our Comments Policy for further details. Your email address will not be published.