එම් එම් ජනප්‍රිය –

වෛද්‍ය​ එම් එම් ජනප්‍රිය

උද්ඝෝෂණ ව්‍යාපාරයට සහභාගී වීම අප කාගේත් යුතුකමකි. එනමුදු මා මේ අභිමතාර්ථය ඉටුකර ගැනීමට ව්‍යායාම සඳහා ළඟ ඇති රනින් ට්‍රැක් එකට යන විලසින් නිවසින් පිටව මහමගට පිවිසියේ ගෙදර උදවියගෙන් මීට අවසර නොලැබුන නිසාය. බත්තරමුල්ලේ සිට ගාලු මුවදොර දක්වා නොකඩවා ජෝග් (හෙමින් දිවීම) කලෙමි. ගූගල් මැප්ස් වල හැටියට පැය දෙකහමාරක කාලයක් ගතවන නමුදු විනාඩි සියයක් පමණ කාලයක් තුල මට ගාලු මුවදොරට ලඟා වීමට හැකි විය.

අතිවිශාල ජනකායක් ඈතින් දිස්වෙමින් තිබේ. විඩා නිවෙනුවස් මම සෙමෙන් ඒ දෙසට ගමන්කලෙමි. ඔවුන් සියල්ලෝම එකහඬින් කියමින් සිටියේ ජනාධිපති ඇතුළු 225ම ඉවත්විය යුතු බවය. මෙතන පමණක් නොව විශාල ප්‍රමාණයේ ජනඝෝෂා ශ්‍රී ලංකාවේ සෑම නගරයකම පාහේ ක්‍රියාත්මක වන බව රුපවාහිනී ප්‍රවෘත්ති මගින් මොනොවට පැහැදිලිවේ.

මේ ලින්ක් එක මගින් මා විසින් එදා පටිගත කරන ලද දර්ශන නරඹන්න (20+) Facebook

ජාතිභේදවලින්, ආගම්භේදවලින් හෝ වෙනයම් බෙදුම්භේදවාදයකින් තොරව එක්වුණ මේ ජනයාගේ අරමුණ එකමය. එනම් දශවර්ෂ ගනනාවක්ම මෙරටේ දියුණුවට අවහිරයක් වී තිබෙන බෙදුම්වාදී සහ අති දූෂිත දේශපාලකයින් පලවා හැර රටේ සුක්කානම අවංක දූරධර්ශී ලන්කාහිතයිශී උගත් කණ්ඩායමකට භාර දීමය. ඔවුන්ගේ මෙම කර්තව්‍යය හුදෙක් තම හද පත්ලෙන් නැගුනු සත්කාර්යයක් සඳහාම මිස කිසිම කෙනෙකුගේ උසිගන්වීමක් නිසා නොවන බව සක්සුදක්සේ පැහැදිලිය. මේ සඳහා කිසියම් යායුතු දුරක් ඇත්නම් ඒ සම්පූර්ණ දුර යාමට ඔවුහු ප්‍රතිඥා දී තිබේ. ඔවුන් දිරිගැන්වීමට ස්වෙච්ඡාවෙන් ඉදිරිපත්වුන කණ් ඩායම් වේ. මේ අතර ඔවුනට ආහාර පානාදිය සපයන අය, වැසිකිලි පහසුකම් සපයන අය, එම වැසිකිලි කැසිකිලි නිතර පවිත්රකරණය සඳහා අයකිරීමකින් තොරව සම්පාදනය කරනලද අබාන්ස් සේවා කණ්ඩායමට අමතරව අතිවිශිෂ්ට ජ්‍යෙෂ්ටයින්ගෙන් හෙබි නීතිඥ කණ්ඩායමක්ද වේ.

මොවුන්ගේ අධි අධිෂ්ඨානශීලී සහ අවිහිංසාවාදී උද්ඝෝෂණයට බිය වැදුන පාලකයින්ගේ පුද්ගලික කුලී හෙවායන්ද, චක්ගෝලයින්ද පවුලේ සමහර ගැහැණු උදවියද රටින් පැන ඇති බව ආරංචි මාර්ග පවසති. අවිහිංසාවාදී උද්ඝෝෂණ කලහැක්කේ ස්වයං හික්මීමක් ඇති සමාජයකට පමණි. මෙවැනි උද්ඝෝෂණවලින් යකඩ මෙන් දරදඬු පාලන පවා කඩා බිඳහෙලීමට හැකි බව මහාත්ම ගාන්ධිගේ සිවිල් අකීකරුකම (Civil disobedience) මගින් ගිලිහුණු මහා බ්‍රිතාන්‍ය පාලනය කදිම සාක්ෂියකි. මෙවැනි උද්ගෝෂණ බිඳදැමීම ඉතා අසීරු කාර්යයකි. එමනිසාම මේ අහිංසක ජනතාවගේ අවිහිංසාවාදී විරෝධය කඩා කප්පල් කිරීමට පාලක වැටුප් රෝලේ සිටින අවන්ටේ ආරක්ශේ වැනි නිවටයින් උපයෝගී කරගෙන උද්ඝෝෂණ පිරිස තුලසිට හිංසාකාරී සහ පොදු දේපල විනාශ කිරීම වැනි පහත් දේ කිරීමට පාලක පක්ෂය යුහුසුළු වීම පුදුමයට පත්වියයුතු දෙයක් නොවේ. තවද කළු ඇඳගත් සහ මුහුණු වසාගත් සන්නද්ධ කණ්ඩායම් යතුරු පැදිවලින් උද්ඝෝෂණ පිරිස් අතරට එවීම රජය මානසික බංකොලොත් භාවයට පත්වී ඇතිබව මොනොවට කියා පෑවේය.

රජයේ සහ පාලක පවුලේ නිම් හිම් නැති දුෂිත ක්‍රියාකලාපය රටවැසියාට තව දුරටත් ඉවසිය නොහැකි විය. රජයේ ඉත්තන්ට සම්බන්ධ අතුරුගිරියේ පිහිටි මුද්‍රණාලයක සල්ලි අච්චුගැසූ බව නොබෝදා ශල්‍ය වෛද්‍ය විශේෂඥයෙකු විසින් චමුදිතගේ යු ටියුබ් මගින් රට්ටුන්ට දන්වන ලදී. මේ සල්ලි වලින් මොවුන් ඩොලර් මිලදීගත් බවට පුරසාරම් දොඩපු හැටිද මෙම වෛද්‍යවරයා විසින් සඳහන් කරන ලදී. මෙසේ අච්චුගසන මුදලින් ගත් ඩොලර් තම පුද්ගලික ගිණුම් වලට රටපැටවීම ඩොලර් හිඟයට සැලකියයුතු හේතුවක් බවද මෙම වෛද්‍යවරයා පෙන්වා දුන්නේය. මුන්ගේ මේ නොමනා ක්‍රියාකලාපය නිසා රට අගාධයට ඇදවැටුණු බව මෙම වෛද්‍යවරයා තවදුරටත් පෙන්වා දුන්නේය.

අත්‍යාවශ්‍ය භාණ්ඩ දුලභ විය. ඒවා ලබාගැනීම සඳහා දිගු පෝලිම් වල ලැගීමට රට්ටුන්ට සිදුවිය. මේ පෝලිම් වල වයෝවෘද​ පුද්ගලයින් සිවුදෙනෙක් මරුමුවට පත්වුහ. තරුණයෙක්ද​ පිහි ඇනුමකින් ජීවිතක්ෂයට පත්විය. මිනිසුන් පාරට බැස්සේ කෙසේ හෝ මේ නොමනාකම් පිටුදැකීමටය. ඔවුන්ගේ විජයග්‍රහණය නොදුරු අනාගතයේදී සිදුවීම වැළක්විය නොහැක. උද්ඝෝෂකයන් ඉල්ලන්නේ ජනපති ඇතුළු මන්ත්‍රීවරු 225ම ඉවත් කරන ලෙසය. මෙය ක්ෂණිකව කිරීම ප්‍රායෝගික නැත. මන්ද? ආර්ථිකය ගොඩනැගීම සඳහා ස්ථාවර රජයක් අවශ්‍ය බැවිනි.

මේ 225 සහ ජනපති ඉතා ඉක්මනින් හෝ මාස කිහිපයකින් හෝ ඉවත්වූ නැතහොත් ඉවත්කළ පසු පාර්ලිමේන්තු මැතිවරණයක් පැවැත්විය යුතුය. මෙම මැතිවරණයෙන් ජයගෙන අර්ථයෙන් ධර්මයෙන් රට ආණ්ඩු කිරීම සඳහා අවශ්‍ය තුන්වන බලවේගය තවම ගොඩනැගී නොමැත. මෙසේ හෙයින් කනෙන් අල්ලා දොරට දැමූ 225න් කොටසක් නැවත දියවන්න ගමට අවතීර්ණවීමේ අවකාශය ඉවත නොහැකි මට්ටමක ඇත.

පොහොට්ටු පක්‍ෂය උගතුන්ට සහ මධ්‍යම පන්තියට එපා වුවාට ආධාර මලු එනකන් නොඉවසිල්ලෙන් බලාසිටින පිටිසර දුප්පත් මිනිසුන්ට දෙවිවරු සේ පෙනෙන්නට පුළුවන. දේශපාලන කාලකන්නින්ට පොදු දේපොළ මංකොල්ල කෑම සඳහා කිසිම පිළිසරණක් නැති දුප්පත් මිනිසුන් අවශ්‍යය. එනිසාම දැනට පවතින තත්වය අනුව පොදුජන එක්සත් පෙරමුණට ආසන පනහක් හෝ හැටක් ලැබීමට ඉඩ ඇත. මේ සඳහා ජාතිවාදී චීවරධාරීන්ගේ කළු බනද 2009 දී කොටින් පරදවා රට ඔවුන්ගෙන් බේරා ගත්තා යන ශීර්ෂ පාඨයද ඉවහල් කරගනු නොඅනුමානයි.

දිග ඉතිහාසයක් ඇති එක්සත් ජාතික පක්ෂයෙන් (ඒ.ජා. ප.) කැඩීගිය සමගි ජන බලවේගයේ (ස.ජ. බ.) ප්‍රගතියද එතරම් සතුටුදායක නැත. ඔවුහු, විශේෂයෙන් ඔවුන්ගේ ප්‍රධානියා තම ජනාධිපති සිහිනය සැබෑ කරගැනීමට වෙහෙසෙන බව පෙනේ. උගත් අවංක මන්ත්‍රීන් අතලොස්සකටද දූෂිත බහුතරයකටද මෙම පක්ෂය උරුම කියයි. මහජනතාව විසින් මොවුන්ද ප්‍රතික්ෂේප කොට ඇති නමුත් ආසන 60 හෝ 70ක් ඔවුන් විසින් ලබා ගන්නවා ඇත.

ජනතා විමුක්ති පෙරමුණ (ජ.වි.පෙ) ජාතික ජන බලවේගය ලෙස ඡන්දයට​ පිවිසෙනු ඇත. ඉහතකී පක්ෂ දෙකට සාපේක්ෂකව ඔවුහු ඉදිරියෙන් සිටිති. ඉහල පෙලේ සතරදෙනෙක් සේපාල් අමරසිංහ නමැති යු ටියුබර් සමග කල සම්මුඛ සාකච්ඡා සියල්ල මම අධ්‍යයනය​ කලෙමි. ජවිපෙ ය ඔවුන් ගැනම කර ඇති ස්වයං තක්සේරුව යථර්ථවාදි නැත. මේ සිවුදෙනාම කීවේ ජවිපෙට මෙවර මැතිවරණය ජයග්‍රහණය කොට තම පක්ෂයේම ආණ්ඩුවක් පිහිටු වීමේ හැකියාව තිබෙන බවය. ඉතිහාසය පෙන්වන්නේ මීට හාත්පසින්ම විරුද්ධ දෙයකි. ජවිපෙයට සැලකියයුතු ආසන ප්‍රමාණයක් ලැබුනු සෑම අවස්ථාවකම ඔවුන් තරඟ කොට ඇත්තේ ලොකු පක්ෂයක සභායගයක් ලෙසය. මෙයට හේතුව වන්නේ ඡන්දදාකයින්ට​ ජවිපෙ කෙරෙහි තිබෙන හුඹස් බයමය. රට වැසියන්හට ජවිපෙය කෙරෙහි පැහැදීමක් ඇත. ඔවුහු ජවිපෙට දානව මයි කියා ඡන්දපොලට ගොස් වෙන පක්ෂයකට තම ඡන්දය දැමු බවයි පෙනීයන්නේ. මෙය සමනය කරගැනීමට ජවිපෙය කලයුත්තේ කුමක්ද? රට පිළිගත් අවංක විද්වතුන් තම පක්ෂයට බඳවා ගැනීමේ ව්‍යාපෘතියක් වහාම දියත්කල යුතුව ඇත. ඔවුහු පසුපුටුවලට තල්ලු නොකොට ඉදිරිපස අසුන්ගැන්විය යුතුය. තවද එයින් දක්ෂ කථිකයන් කිහිපදෙනෙක් හඳුනාගෙන ඔවුන් ලවා රට්ටුන් ඇමතීම නිතර කල යුතුය. ඔවුහු අලුත බැඳුනු අය බැවින් මැති ඇමතිකම් බලාපොරොත්තු නොවනු ඇත. එනමුදු උගත් අවංක හා කාර්යක්ෂම අය සුදුසු නිලවලට පත්කිරීම පක්ෂයේ සුභසිද්දියට ධනාත්මකව බලපානු ඇත. ජවිපෙය මෙසේ නවීකරණය කිරීමට අපොහොසත්වුවහොත් වැඩිම වශයෙන් ඔවුන්ටත් පාර්ලිමේන්තු ආසන පනහකට වඩා නොලැබෙනු ඇත.

ඉතිරි ආසන 40 හෝ 45 ටැමිල් නැෂනල් එලයන්ස්, ශ්‍රී ලංකා මුස්ලිම් කොන්ග්රෙසය, ඕල් සිලෝන් මක්කල් කච්චි, ඊලාම් පීපලස් ඩිමොක්‍රටික් පාටි, සිහල උරුමය, නව ප්‍රජාතන්ත්‍රවාදී පෙරමුණ, ශ්‍රී ලංකා නිදහස් පක්‍ෂය සහ එක්සත් ජාතික පක්ෂය අතර බෙදී යනු ඇත. මේ අතර තනිව තරඟ කලොත් නව ප්‍රජචන්ත්රවාදී පෙරමුණ සහ සිහල උරුමය දේශපාලන ක්ෂේත්‍රයෙන් සදහටම අතු ගෑවී යෑමට බෙහෙවින් ඉඩ ඇත.

රට්ටුන් ඉල්ලන්නේ දූෂිත​ 225න් තොර නව පක්ෂයකි. භාරකාර ආණ්ඩුවක් මගින් වසරක් රට පාලනය කළහොත් මේ වසර තුල අපට මෙවැනි පක්ෂයක් ගොඩනැගීමට හැක. තරුණ උද්ඝෝෂකයින් ඉල්ලන්නේ තරුණ ආණ්ඩුවක්සේ පෙනෙන නමුත් එය එසේ වීම ප්‍රයෝගික නැත. මාගේ යෝජනාව ඔවුන්ගේ සටන් පාඨයට ප්‍රතිවිරුද්ධ දෙයකි. සත්තකින්ම අවංක උගත් ක්‍රියාශීලී සහ නිරෝගී විශ්‍රාමිකයින්ට පමණයි මෙය කල හැක්කේ. ඔවුනට ඔටුනු පැලඳවීමට කුමාරවරු නැත. නැගීමට තනතුරක් නැත. කෙසේ හෝ මුදල් ගොඩ ගැසීමේ අරමුණක් නැත. මාසික වැටුපක් අවශ්‍ය නැත. (අතින් වන ව්යදම් සැපයිය යුතුය) තවත් විශ්‍රාම වැටුපක් අවශ්‍ය නැත. විශාල සුඛෝපභෝගී වාහන අවශ්‍ය නැත. පොදු වාහන සංචිතයක් හොඳටම ප්‍රමාණවත්ය.

රටේ ආර්ථිකය ආපසු හැරවීම රොකට් විද්‍යාව මෙන් අසීරු නැත. අපේ රට ආර්ථික ආවාටයකට වැටීමට හේතු බැලුවහොත් දූෂණය, නාස්තිය සහ බාලාංශ පන්ති මට්ටමේ කළමනාකරණය යන තුන්කට්ටුව සතර දිගින් හොල්මන් කරනු පෙනේ. එසේ හෙයින් දූෂණය සහ නාස්තිය පමණක් නැවත්වුවහොත් වසර දෙකකට අඩු කාලයකින් ලාංකිකයන්ගේ ජීවන තත්වය සතුටුදායක මට්ටමකට උසස්වීම සක්‍රියව කලයුතු වන්නේ නැත. ඊළඟ වසර තුන සක්‍රියව ආර්ථික වර්ධනය සඳහා උපයෝගී කරගත යුත්තේ ආර්ථික විශේෂඥයන්ගේ නොමසුරු සහාය සමගය.

මෙවැනි කණ්ඩායමකට අවුරුදු 5ක කාලය තුල මේ රට මැදි ආදායම් රටක් බවට පත්කිරීමට පුළුවන. ඉන්පසු මොවුන් ඉවත්වී තවත් මෙවැනිම කන්ඩායමක් හෝ සුදුසු තරුණ කණ්ඩායමක් රට භාරගෙන ඉදිරියට ගෙනයා යුතුය. මෙසේ පූර්ණ වසර දහයකින් මේ රට සංවර්ධිත​ රටක් බවට පත්කිරීමට හැකිවේයයි මාගේ විශ්වාසයයි.