14 December, 2017

Blog

අයිවන් ගේ බිරුම ට පිළිතුරක්

මාලින්ද සෙනෙවිරත්න

මාලින්ද සෙනෙවිරත්න

මාලින්ද සෙනෙවිරත්න

“බල්ලන්ගේ බිරුම මැද්දේ ඉදිරියට යන තවලම” යන මැයෙන් වික්ටර් අයිවන් විසින් රචිත ලිපියක් ‘රාවය’ පුවත්පතෙහි පළ කොට තිබේ. එම ලිපියේ අයිවන් මා ගැන ඔහු දන්නවා යැයි සිතන කරුණුද, මා ලියු ලිපියක් ගැනද සඳහන් කර ඇත. ඒ පිළිබඳව පැහැදිලි කිරීමක් බලාපොරොත්තුවෙන් රාවය කර්තෘ කේ. ඩබ්ලිව්. ජනරංජන වෙත ඊමේල් පණිවුඩයක් යැවුවෙමි (අයිවන් ද පිටපත් කරමින්). ඉංග්‍රීසියෙන් ලියු එහි අඩංගු කරුණු සැකෙවින් මෙලෙසයි:

“අයිවන් චෝදනා කරන්නේ ‘ද නේෂන්’ පුවත්පතේ ඔහුගේ මූල්‍ය ගනුදෙනු පලවූ පුවතක් පළ කිරීමට පෙර එම පුවත්පතේ එවකට හිටපු කර්තෘ ලෙස මා ඔහුගෙන් පැහැදිලි කිරීමක් ඉල්ලා සිටියේ නැති බවයි. එම පුවතට අදාළ සියලු ලියකියවිලි එවිටද පළ වී තිබුන බැවින් තව දුරටත් අයිවන් ගෙන් විමසන්න කිසිවක් නොතිබුණි. ඒ කෙසේ වෙතත් එසේ නොවිමසීම වරදක් නම්, පහත කරුණ වලට ඔබගේ ප්‍රතිචාර බලාපොරොත්තු වෙමි:

“ඉහත සඳහන් ‘විමසීමේ’ අවශ්‍යතාවය පිලිබඳ අයිවන් ගේ ස්ථාවරය ඔබ අනුමත කරන්නේ ද? එසේ නම් පහත කාරනා පිළිබඳව ඔබට කිව හැක්කේ කුමක් ද?

“නම සඳහන් නොකරන වෙබ් අඩවියක නම සඳහන් නොකරන සංස්කාරයකයෙකු සමග සමීප සම්බන්ධයක් මට ඇති බවද එහි පළවන ඉංග්‍රීසි පුවත් මා සංස්කරණය කරන බවද අයිවන් කියා ඇත. ඒ පිළිබඳව රාවය කර්තෘ හැටියට ඔබ මාගෙන් නොවිමසුවේ මන්ද?

“අයිවන් තවද ප්‍රකාශ කර සිටින්නේ සණස සංවර්ධන බැංකුව ට අදාළ පුවතක් රාවයේ පළ නොකරන ලෙස මා ඔහුගෙන් ඉල්ලා සිටි බවයි. මෙම බරපතල සහ ද්වේශසහගත චෝදනාව පිලිබඳ රාවය කර්තෘ හැටියට ඔබ මාගෙන් නොවිමසුවේ මන්ද? මා අයිවන්ට කථා කළේ එම පුවත රාවයේ පළ වූ පසුවයි. එබැවින් ‘පළ නොකිරීම’ අදාළ නැත. අදාළ පුවත සාවද්‍ය බව ද, ද්වේශසහගත බවද ඒ පිළිබඳව ඔහු දැනුවත් විය යුතු බවද ඔහුට පැවසුවා පමණි. ඒ කෙසේ වෙතත් කිසිම දවසක කිසිම පුවතක් පළ නොකරන ලෙස මා ඔබගෙන් ඉල්ලා සිටියේද? තවද, අයිවන්ගේ ගේ මේ අභූත චෝදනා පිළිබඳව රාවය කර්තෘ හැටියට ඔබ මාගෙන් නොවිමසුවේ මන්ද?

“මා කළු සල්ලිකාරයකුගේ ‘පස්ස පැත්ත ලෙවකා’ රස්සාවක් ගත්තා යැයිද අයිවන් චෝදනා කරයි. එම අභූත සහ ද්වේශසහගත චෝදනාව පිළිබඳව රාවය කර්තෘ හැටියට ඔබ මාගෙන් නොවිමසුවේ මන්ද?

“ගෝඨාභය රාජපක්ෂ විසින් මෙහෙය වන ලද මාධ්‍ය කණ්ඩායමක මමද සිටියේ යැයිද, එබැවින් ගෝඨාභය රාජපක්ෂ මාව ‘බලාගත්තා’ කියාද අයිවන් චෝදනා කර ඇත. ඒ පිළිබඳව රාවය කර්තෘ හැටියට ඔබ මාගෙන් නොවිමසුවේ මන්ද?”

ජනරංජන ට මේ ඊමේල් පණිවුඩය යැවීමෙන් අනතුරුව ඔහුට දුරකථනයෙන් ඇමතුවෙමි. ඊමේල් පණිවුඩයට පිළිතුරක් එවන බව​ ඔහු කියා සිටියේ ය. කාර්යබහුල බැවින් ඔහුට ඒ සඳහා අවකාශයක් නොතිබුනා යැයි සිතමි. කෙසේ වෙතත් අයිවන් තවමත් නිහඬ යි.

අවසානයේ අයිවන්ගේ බිරුමට කෙටි පිළිතුරක් ජනරංජන මහතා වෙත යවුවෙමි. ඔහු එය රාවයේ පළ කර ඇත. පහත දක්වා ඇත්තේ එම සටහන වේ:

ට්‍රාන්ස්පේරන්සි ඉන්ටනැෂනල් සංවිධානය විසින් අයිවන් ට ප්‍රධානය කරන ලද ‘ඉන්ටග්‍රිටි’ සම්මානය සඳහා අයිවන් ගේ සුදුසුකම් මෙන්ම එය පිළිගැනීමට අයිවන් ට ඇති සදාචාර අයිතිය ද මා ප්‍රශ්න කර සිටියෙමි. ප්‍රවීන මාධ්‍යවේදියෙකු ලෙස මා විසින් ඉදිරිපත් කරන ලද කරුණු පිලිබඳ පැහැදිලිකිරීමක් මම ඔහුගෙන් බලාපොරොත්තු විය. ඒ වෙනුවට අයිවන් මාධ්‍ය භාවිතය පිලිබඳ තමා විසින්ම ඉදිරිපත් කර ඇති කොන්දේසි උල්ලංඝනය කරමින් වසුරු කෙලියක නිරත වී ඇත. එයට සම්මාදම් වීම ට මට අවශ්‍ය නැත. එහෙත් අතීත මාධ්‍ය භාවිතයක විශිෂ්ටතත්වයක් කියා පාමින් මා පිලිබඳ ඉතාම වැරදි චිත්‍රයක් නිර්මාණය කිරීම වගකීම් විරහිත බැවින්ද ද්වේශසහගත බැවින් ද ඒ හරහා පාඨකයින් මුලා කිරීමක් සිදුවිය හැකි බැවින්ද පහත කරුණු සඳහන් කරමි.

කිසිම දවසක කිසිම කෙනෙකුගෙන් කිසිම මාධ්‍ය ආයතනයක රැකියාවක් මා ඉල්ලා නැත. මාධ්‍ය ආයතන වල රැකියා මට යෝජනා වූ හැම අවස්ථාවකම ඒවා බාර ගත්තේද නොගත්තේද මා සතුටුවන මාධ්‍ය භාවිතයක යෙදීමට ප්‍රමාණවත් අවම අවකාශයක් ඇත්ද නැතිද යන කාරණය පදනම් කොට ගෙන වේ. එම අවම කොන්දේසි උල්ලංඝනය වූ හැම අවස්ථාවකම අදාළ තනතුරු වලින් ද අදාළ ආයතන වලින්ද මා සමුගෙන ඇත. කිසිම දවසක කිසිම මාධ්‍ය ආයතනයක කිසිම ප්‍රධානියෙකුගෙන් කිසිම පුවතක් හෝ ලිපියක් පළ නොකරන ලෙස ඉල්ලා නැත. මතවාදීමය විරෝධතා හැරුණු විට කිසිම මාධ්‍යවේදියෙකු සමග වෛරයක් හෝ අමනාපයක් මා හට නැත.

Print Friendly, PDF & Email

Latest comment

  • 2
    0

    You may have reasons to justify this reply, clearing the gabage. But look at the man with whom you have engaged in a war of words. Utter wastage of time. You call this is a man worth writing a simple sentence for. Save you breath mate.

Leave A Comment

Comments should not exceed 300 words. Embedding external links and writing in capital letters are discouraged. Commenting is automatically shut off on articles after 10 days and approval may take up to 24 hours. Please read our Comments Policy for further details. Your email address will not be published.